మేలుకొలుపులు పాడువేళ-జోల పాటలు పాడనేల
యువత జాగృతి చెందువేళ-మరల నిద్దుర పుచ్చనేల || మేలుకొలుపులు||

వెలుగు నిండే కంటిముందు-నలుపు తెరలను దించనేల
జవము చంపే మత్తుమందు-యువతకిపుడందించనేల || మేలుకొలుపులు||

ప్రగతి పూవులు పరచు దారిన –రాజకీయపు కంపలేల
సమత సౌరభ మారుతమున- కులమతమ్ముల కంపులేల || మేలుకొలుపులు||

కొంపనలుదెసలంటుకొనిన-కోతికొమ్మల ఆటలేల
ఉగ్రవాదపు ఊచకోతకు-ఊక దంపుడు మాటలేల || మేలుకొలుపులు||