మురిపించవేర నను మురళీ కృష్ణా
తీర్చగ రావేర నా జీవన తృష్ణా
1. గోదావరినే యమునగ భావించి
నా హృదయమునే బృందావనిజేసి
వేచితి నీకై యుగయుగాలుగా
కొలిచితి నిన్నే నా ప్రణయ స్వామిగ
2. పికము పాటనే పిల్లనగ్రోవని
నే పరవశించితి వసంతమై
నీలిమేఘమే నీవని భ్రమిసి
మైమరచి ఆడితి మయూరమై
3. కోకలు దోచే తుంటరి నీవని
జలకములాడితి వలువలు విడిచి
రసికత నేర్చిన సరసుడవీవని
వలపులు దాచితి విరహము సైచి
No comments:
Post a Comment