స్వాగతమయ్యా మహాశయా! సుస్వాగతమయ్యా మహోదయా
ఘనతవహించిన ఘనులే మీరు-గణుతికెక్కిన మహనీయులు

1. మీరాకతోనే ఈ సభనేడు -పరిపూర్ణత సంతరించికొనెను
మిము దర్శించగ మామనసీనాడు-ఆనందముతో డోలలూగెను

2. మా ఆహ్వానము మన్నించిమీరు-పెద్దమనసుతో ఇట కేతెంచినారు
క్షణమైన తీరిక చిక్కనివారు-దయతో సమయము కెటాయించినారు

3. అరుణ తివాచీలు పరువగ లేము -పన్నీటిజల్లులు చల్లించలేము
పుష్పవర్షమును కురిపించలేము-కనకాభిషేకము చేయించలేము

4. ఏరీతిగ మిము సమ్మానింపగలము-ఏపదముల మిము కీర్తించతరము
ఉడుతాభక్తిగ వందన మిడుదుము-మీ కీర్తి గురుతుగ జేజేలు కొడుదుము