నేను రహదారిని-కడదాక తోడుండీ చేర్చేను నీ గమ్యాన్ని
నేను మార్గదర్శిని-సులభంగ సాగేలా చేస్తాను పయనాన్ని

నేను కర్మ యోగినీ చూపించనెవ్వరికీ తరతమ భేదాన్ని
నేను కరుగు కాలాన్నీ తిరిగి ఇవ్వనెప్పటికీ చేజారిన క్షణాన్ని

నేనో కవి కలాన్నీ -రచియిస్తా సమానవతా వేదాన్ని
నేను మధుర గళాన్నీ-ఒలికిస్తా సుమకరంద నాదాన్ని

నేను మహా వృక్షాన్నీ- ఛాయకాయపత్రంఫలం అందిస్తా అన్నీ
నేనో సజీవ ఝరిని-తీరుస్తా దాహార్తుల దాహాన్ని

నేను సమున్నత లక్ష్యాన్ని-చేకూరుస్తా ననుజేరగ విజయాన్ని
నేను జన్మరహిత మోక్షాన్ని-రాఖీ నీకే లంపటమంటనీయని సత్యాన్ని