Saturday, August 29, 2009

కోకిల నీ గొంతులో గూడుకట్టుకున్నది
చిలుకలు నీ పలుకులలో కులుకులొలుకుతున్నవి
హంసలే నిను చూసి నడక నేర్చుకున్నవి
మయూరాలు నాట్యానికి నీవే గురువన్నవి
1. జాబిల్లి నిను చూసి మొహం మాడ్చుకున్నది
గులాబీలు నీకన్నా సుకుమారులు కావన్నవి
సన్నజాజికి నిన్ను చూసి కన్నుకుట్టుతున్నది
వెన్నముద్దనీ మనసుకన్న మెత్తనవాలనుకొన్నది
2. చల్లగాలికన్న నీ స్పర్శనే హాయి కదా
పట్టుతేనె కన్న నీ పెదవులే తీయనా
భోగిమంటకన్న నీ కౌగిలే వెచ్చనా
సుగుణాలరాశివె చెలి నిన్ను చూసి మెచ్చనా
3. నీ సాన్నిహిత్యమే నాకు సాహిత్యము
నీ రూపలావణ్యము శిల్పకళాచాతుర్యము
వరముగనే పొందాను నీ సజీవ చిత్రము
నీతో నా జీవితమే అమర సంగీతము