Thursday, November 12, 2015

తరువు-గురువు



వృక్షమే లక్ష్యంగా -జీ’వనాన’ పయనిద్దాం
మానుయే గమ్యంగా -మనుగడను సాగిద్దాం
మొక్కలనే పాపలుగా –మన అక్కున చేర్చుకుందాం
చెట్టపట్టాలు కట్టి –చెట్టు జట్టు చేరిపోదాం

“బ్రతుకు తెరువు నేర్పేటి –గురువేగా ప్రతి తరువు
బ్రతుకు పరమార్థం తెలిపే-నిఘంటువే హరిద్రువు”

1.   పుడమి కడుపు చీల్చుకొని-తనకు తానే పుడుతుంది
ఆలన పాలన లేకున్నా-మొండిగా బ్రతికేస్తుంది
మోడుగా మారిన కూడా-చినుకు తాక చిగురిస్తుంది
దైన్యమన్నదే లేక-ధైర్యంగా నిలబడుతుంది

“బ్రతుకు తెరువు నేర్పేటి –గురువేగా ప్రతి తరువు
బ్రతుకు పరమార్థం తెలిపే-నిఘంటువే హరిద్రువు”

2.   పంచలేనిదేదీ లేదు-తరువు తనువులో
వినియో గించ దగినవే అణువణువూ-మాను మేనులో
విత్తు వేరు బెరడు పసరు-ఔషదాలె వ్యాధులకు
ఆకు కాయ పండు దుంప –అమృతాలె ఆహారానికి

“బ్రతుకు తెరువు నేర్పేటి –గురువేగా ప్రతి తరువు
బ్రతుకు పరమార్థం తెలిపే-నిఘంటువే హరిద్రువు”

3.   ఆకులూ తీగలతో-ఇంటికంద మిస్తుంది
పూవులూ ఫలములతో-పూజకు పనికొస్తుంది
ఎండా వాన పడకుండా-నీడ నిచ్చి అండవుతుంది
జీవనాధారమైన-ప్రాణవాయువిస్తుంది

“బ్రతుకు తెరువు నేర్పేటి –గురువేగా ప్రతి తరువు
బ్రతుకు పరమార్థం తెలిపే-నిఘంటువే హరిద్రువు”

4.   రాయబోతే చెట్టు చరితయే-రామాయణ మౌతుంది
విప్పి చెబితె వృక్ష నీతియే-కృష్ణ గీత అవుతుంది
కూడు గూడు నీరందించే-విశ్వ స్రష్ట యే కుజము
చావు పుటుకలన్నిటిలో-చెట్టు మనిషి నేస్తము

“బ్రతుకు తెరువు నేర్పేటి –గురువేగా ప్రతి తరువు
బ్రతుకు పరమార్థం తెలిపే-నిఘంటువే హరిద్రువు”









Monday, October 19, 2015

చేరినంతనే స్వామీ -నీ –చరణాల చెంత
మనసుకెంత నిశ్చింత - మనసుకెంత నిశ్చింత
అర్పించినంతనే-స్వామీ నీకు -నా భార మంతా
ఎంత హాయి బ్రతుకంతా - ఎంత హాయి బ్రతుకంతా
1. ఎడారి దారిలోనా – ఒయాసిస్సు వౌతావు
అమావాస్య నిశిలోనా-పున్నమి శశి వౌతావు
ఆశలు అడుగంటిన వేళా- అదృష్టము నీవౌతావు
వేడినంతనే స్వామీ వెన్నుదన్ను వౌతావు
2. తుఫానులో చిక్కిన నావను – తీరానికి చేరుస్తావు
దారితప్పి తిరుగుతుంటే- మార్గదర్శి వౌతావు
ఆశలు అడుగంటిన వేళా- అదృష్టము నీవౌతావు
వేడినంతనే స్వామీ వెన్నుదన్ను వౌతావు
3. బీడుపడిన నేలకు నీవే-వాన చినుకు వౌతావు
మోడైన మ్రానును సైతం –చివురులు వేయిస్తావు
ఆశలు అడుగంటిన వేళా- అదృష్టము నీవౌతావు
వేడినంతనే స్వామీ వెన్నుదన్ను వౌతావు
4. నిర్లక్ష్యపు జీవన గతిలో-నా లక్ష్యం నీవే స్వామీ
చిక్కుబడిన భవ బంధాలకు-మోక్షమింక నీవే స్వామీ
ఆశలు అడుగంటిన వేళా- అదృష్టము నీవౌతావు
వేడినంతనే స్వామీ వెన్నుదన్ను వౌతావు

Saturday, October 3, 2015

తీయనిదొక్కటే....అమ్మ అన్న పదము..
తీరని దొక్కటే..కన్న తల్లి ఋణము..
అమ్మ ప్రేమ కేది లేదు కొలమానము..
అమ్మ త్యాగ ఫలితమే..దేహము ప్రాణము
అమ్మంటేనే...అనురాగము
అమ్మకు మారు పేరు త్యాగము....

1.      1.) జబ్బు పడినప్పుడల్లా..అమ్మేగా..డాక్టరు..
కునుకైనా తీయకుండ సేవచేయు సిస్టరు..
చిట్కా వైద్యాలు..దిష్టి తీయడాలు..
మెడలో తాయెత్తుకట్టి..నుదుటన విభూతి పెట్టి
జాతకాలు చూపెట్టి..గ్రహ శాంతులు చేపించి
ముక్కోటి దేవుళ్ళకు ముడుపుకట్టు...ఆరాటము
నయమయ్యే వరకు..అనునయించు..వైనము..
అమ్మంటేనే...అనురాగము
అమ్మకు మారు పేరు త్యాగము....

2.   2)    ఏ తప్పు నువ్వు చేసిన..తనపైన వేసుకొనే లయ్యరు
గుడ్డిగా నీ తరఫున వకాల్తా పుచ్చుకొననే లాయరు
పోపుల పెట్టెలోన దాపెట్టిన డబ్బులిచ్చి
నీ తండ్రి దండనకు అడ్డునిల్చి తా భరించి
అరికాలు నొవ్వకుండ-ఈగ వాలనివ్వకుండ
కంటికి రెప్పలాగ కాచిన..మమకారము
నోముల పంటగా..చేసిన ..గారాబము
అమ్మంటేనే...అనురాగము
అమ్మకు మారు పేరు త్యాగము....











Tuesday, September 29, 2015

నువ్వలా.. నువ్వలా..నువ్వలా


గుండెలో ఉండిపో గువ్వలా
పెదవిపై ఒదిగిపో నవ్వులా
ఎన్నడూ..వాడనీ పువ్వులా..
ఘల్ఘల్లని మ్రోగే మువ్వలా
వెలుగులు పంచే దివ్వెలా
నువ్వలా.. నువ్వలా..నువ్వలా

1.   1.    అక్కున జేర్చుకున్న ఆనందంలా
అనుభూతులు విచ్చుకున్న ఆహ్లాదంలా
కార్తీక పౌర్ణమీ రేయిలా...కలయే నెరవేరిన హాయిలా
యమునా నదిలా..రాధిక హృది లా
వంశీ నాదంలా...నువ్వలా..నువ్వలా...నువ్వలా...

2.       2.జన్మలు వెంటాడుతున్న అనురాగం లా
 మనసులు పెనవేసుకున్న అనుబంధం లా
 ఎడారిలో ఒయాసిస్సులా---నిశీధి చీల్చే ఉషస్సులా
  బీడుకు వానలా...తేటికి తేనెలా
  మృతసంజీవనిలా .. నువ్వలా..నువ్వలా...నువ్వలా...






Thursday, September 17, 2015


ఓ సుముఖా- వినాయకా- శుభదాయకా
రావయ్యా –మాయింటికి-ఎలుక నెక్కి చకచకా
ఇల్లెడింటి వారమంత- స్వాగతిస్తు వేచినాము
కాసింత చూపవయ్యా-మా పైన కనికరము

1.    బంతులు చామంతులు-దారంతా పరిచినాము
మామిడాకు తోరణాలు-ద్వారాలకు కట్టినాము
ఇరవయొక్క పత్రాలు-సేకరించి పెట్టినాము
నువుమేచ్చే మందారాల –మాల గుచ్చి ఉంచినాము

పూజలందుకోవయ్యా- ఓ గణపయ్యా
విన్నపాలు దీర్చవయ్య-ఓ వెంకయ్యా

2.    ముదముతోడ మోదకాలు- ఆరగించవయ్యా
ప్రియమారగ ఉండ్రాళ్ళు –బోజ్జనింపుకోవయ్యా
తనివిదీర పాయసాన్ని-కడుపార గ్రోలవయ్య                                  
వండి వార్చి ఉంచినాము-దండిగ భుజియించవయ్య

నివేదనలు నీకివే లంబోదర లకుమికరా
వేదనలను తొలగించర   పాశాంకుశ ధరా
www.4shared.com/mp3/vCsn0Tbgba/O_SUMUKHA_VINAYAKA.html?
https://youtu.be/zR-oyHHOAYU




Monday, August 3, 2015

స్వామీ నీ సాన్నిద్యం !



పల్లవి:       మనలేను ప్రభూ
               నిమిషమైన నిన్ను గనక
               ఏమనలేను ప్రభూ
               అంతా నీ మాయ గనుక

అనుపల్లవి: నీ దృక్కులు ప్రసరించు
              నీ దయ కురిపించు
              చేయిపట్టి నడిపించు
              కడదాకా విశ్వ జనక

చరణం:1)   అందాలను చూపెట్టి
              బంధాలలొ పడగొట్టి
              తాయిలాలు ఆశపెట్టి  
              కావాలని పట్టుబట్టి
 
             లోకమనే మైకంలో   
             నిర్దయగా నను నెట్టి
             చోద్యమింక చూతువేల
             ఓ జగజ్జెట్టి....

చరణం:2) నిను చదువగ వేరే
            బడికేగుట అవసరమా
            నినునిలుపగ ఎదలో
            గుడికేగుట సంబరమా

            సూత్రధారి వీవని
            పాత్రధారి నేనని
            మర్మమెరుగునoతలోనే   
            మరల మరపు చెరలొ బడితి