Tuesday, January 9, 2018

రచన:రాఖీ॥సారస్వత సామ్రాజ్ఞి

నీ దాసుడనే నీ ధ్యాసుడనే
నిమిషము మరువని నీ భక్తుడనే అనురక్తుడనే
దయగను దేవీ హృదయముగనవే
కణకణమూ నీ భావనయే
అనుక్షణమునీ ఆరాధనయే

1.నీ పద సన్నధి నాకది పెన్నధి
నీ వీక్షణలో కరుణరసాంబుధి
నీ దరహాసము నిజ మధుమాసము
నీ సాన్నిధ్యము నిత్య కైవల్యం
దయగను దేవీ అనురాగము గనవే
అక్షరమౌ నీ భావనయే
సలక్షణమౌ నీ సాధనయే

2.నీ పూజకు నే చామంతిని
నీ ఆటకు నే పూబంతిని
నటనలు చాలించి అక్కున జేర్చవె
చరణము లందించి  గ్రక్కున బ్రోవవె
పలుకుల రాణీ నను చులకన జేయకు
శరణము నీవే శరదిందు వదన
ననునడిపించవె సవ్య పథమున.. నవ్య పథమున