అల్పమైన యానకాలు-ప్రేమకు ముద్దు ఆలింగనాలు
విశదపరచవే కవనాలు-మమతలకల్పనలో తడబడగా అక్షరాలు
భాష వ్యక్త పరుచలేదు-స్పర్శ తృప్తి కలిగించదు
పుక్కిట బంధించలేము-అనురాగ సాగరాలు
గ్రక్కున ప్రకటించలేము-ఉప్పొంగే మమకారాలు

1.చూపుల తూపులు సంధించినా
పెదవుల నవ్వులనే చిందించినా
తీయనైన పలుకులతో లాలించినా
అనునయ చర్యలతో సాంత్వనకూర్చినా
ధారపోయలేము సర్వస్వము
హృదయభరితమైన ప్రణయము
శూన్యపరచలేము మనో సరసము
తోడుతుంటె ఊరేటి ఆబంధము

2.స్వీయ చిత్రికలతో బంధించినా
కానుకలు బహుమతులు అందించినా
హస్తసంతకాలనే సేకరించినా
సన్మానం సత్కారం సమకూర్చినా
అసంపూర్ణమెప్పటికీ మనోగతము
పంచినా  తరిగిపోదు ఆ భావము
వింతవింత సంగతులకు ఆలవాలము
ఎనలేనిది ఘనమైనది అభిమానము