రచన,స్వరకల్పన&గానం:రాఖీ

స్పందన లేదు-అభినందన లేదు
డెందములో అనుబంధం లేదు
వ్యక్తిగా  ఏ నియంత్రణ లేదు
మనిషిగా మనిషిపై మమకారం లేదు
ఏదీ లేక బ్రతికే బ్రతుకు ఎంతటి చేదు

1.ఇంతకు మించినదేదో జీవితమన్నది ఒకటుంది
అప్పచ్చులకే ఆశపడ్తె విందుభోజనం అందకుంది
వాట్సప్పొక మహమ్మారి ఫేస్బుక్కొక మాయలాడి
సోషల్ మీడియానే ఓ పనిలేని సోంబేరి
బాంధవ్యాలు భారమాయే స్నేహితాలు దూరమాయే
మిథ్యా ప్రపంచమే వదలలేని వ్యసనమ్మాయే

2.ప్రాధాన్యతలు మారిపోయే ఆప్యాయతలు కరువాయే
పక్కనున్నా పలుకలేక సంక్షిప్త సందేశమాయే
భాషకాస్త కురచనాయే వింత మూగ సంఙ్ఞలాయే
వద్దుపొమ్మని మొత్తుకున్నా చెత్తంతా భరించుడాయే
తక్షణమే ఉన్నఫళంగా ఉపహరించుకొంటే మేలు
మనదైన వాస్తవలోకం అనుభవించితే ఆనందాలు