"గెలుపు బా(పా)ట"

ఆశ బ్రతుకు నిస్తుంది
తపన వెన్నుతడుతుంది
జీవన్మరణ ఘర్షణలో
మనుగడకై పోరులో
ఆశయం స్ఫూర్తి నిస్తుంది
సంకల్పం గెలుపునిస్తుంది

1.ఈత నేర్చుకోలేక చేపకు గతిలేదు
రెక్కవిప్పుకోకుంటె పిట్టకు దిక్కులేదు
కూడబెట్టుకోకుంటె చీమకు భవితలేదు
ఉపాధి కనుగొనక యువతకు మారులేదు
సాధన పెంచుతుంది ప్రావీణ్యం
పట్టుదలే తుంచుతుంది ప్రతిదైన్యం

2.తోకతెగిన బల్లైనా వెనుకడుగే వేయదు
మూతికాలి పిల్లీ తన యత్నం మానదు
సూక్ష్మప్రాణి దోమకూడ వేటాడుటనాపదు
ఏదో ఒక మిషతొ యువత ఊసూరుమన తగదు
కంటకాల బాటే జీవితమంటే
ఓటమే ఓడుతుంది మనోధైర్యముంటే