రచన,స్వరకల్పన&గానం:డా.రాఖీ
గీటురాయి కెరుక పసిడి చొక్కదనమెంతో
కలహంసకే ఎరుక పాల చిక్కదనమెంతో
గులకరాయి కెరుక గరగ గట్టిదనమెంతో
నాకు మాత్రమే ఎరుక చెలీ మిక్కిలైన నీ చక్కదనమెంతో
1.కొలవడానికేదో కొలమానముంటుంది
తూచడానికైతేనో తూనికరాళ్ళుంటాయి
విశ్వవ్యాప్తి ఎంతటిదో కాలానికే ఎరుక
శ్రీకృష్ణుని బరువెంతో తులసిదళానికే ఎరుక
నీ చక్కదనం ఎక్కడుందొ నాకు మాత్రమే ఎరుక
2.చీరకున్న మన్నికను చేతపట్టి చూడాలి
తేనెలోని నాణ్యతను నిప్పు పెట్టి చూడాలి
కాపురం నిబద్ధత సర్దుబాటు కెరుక
ప్రేమలోని స్వచ్ఛత త్యాగానికే ఎరుక
నీ చక్కదనం ఎక్కడుందొ నాకు మాత్రమే ఎరుక