రచన,స్వరకల్పన&గానం:రాఖీ

రాగం:మోహన

పాతకాలుచేసితినో-తెలిసి తెలియకా
ఘాతుకాల నొడగట్టితినో
దోషములొనరించితినో నీ ఎడల
దూషణలే నుడివితినో
పరమశివా హే పరమ దయాళా
ఐనను మన్నించరా నను మన్నన సేయరా

1.అధముడనో నేను ఘోర దురాత్ముడనో
గతజన్మలలోనూ ఈ జన్మయందునను
ఉచితానుచితముల యోచించకుంటినో
మితిమీరిన గర్వము వ్యవహరించుచుంటినో
శివునాజ్ఞలేకా చీమైనా కదలదందురే
జగమంతా నీ ఆటకు రంగస్థలమందురే
నటరాజేశ్వరా రాజరాజేశ్వరా
అందుకు మన్నించరా నను మన్నన సేయరా

2.విషసర్పమైనను గరిమ హస్తియైనను
కీటక భక్షి ఆ సాలెపురుగు నైనను
నిర్దయగా వేటాడే తిన్నడినైనను
క్రూరకర్మలొనరించే దైత్యులనైనను
కనికరముతొ వరములనిడి కరుణించితివి
ఆదుకొని ఆదరించి నీ అక్కునజేర్చితివి
కాళహస్తీశ్వరా హేభోళా శంకరా
ఆ విధి మన్నించరా నను మన్నన సేయరా

కానేరదు మన కలయిక నమ్మశక్యము
నా ఊసే నీ మనసున కాదు ముఖ్యము
నీ పాటి లేనెలేదు నాకు లౌక్యము
ఎండమావె నా బ్రతుకున ఎప్పటికీ సౌఖ్యము

1.ఉడికించడం నీకు పరిపాటే
ఊరించడం నీ కలవాటే
ఆశాభంగమవగ నా గ్రహపాటే
నెగ్గించుకుంటావు నీమాటే

2.ప్రేమంటే నీకుతోలుబొమ్మలాట
నా గుండెతోటి ఆడేవు బంతాట
చేయబోకు మనబంధం నవ్వులాట
భగ్నహృదయమెప్పటికీ ఆరనిమంట