రచన,స్వరకల్పన&గానం:డా.రాఖీ

పల్లె తల్లి కన్న పిల్లలం

నేల తల్లి నే నమ్ముకున్న జీవులం

కుస్తాపూర్ వాసులం మంచికెపుడు నేస్తాలం

శ్రీరామలింగేశ్వరుని వీరభక్తులం

ఊరు బాగు పట్ల ఎంతో ఆసక్తులం

1.వ్యవసాయం ఊపిరిగా బ్రతికేటి రైతులం

పదిమందికి సాయంచేసే మానవతా వాదులం

కష్టించి పనిచేస్తూ అభివృద్ధి చెందే వారలం

దేశాలు దాటినా పుట్టినూరును మరువలేం

2.గోదాట్లో మునిగిన పల్లెను తిరిగి నిలబెట్టాము

రామలింగేశుని గుడిని మళ్ళీ మేం కట్టాము

మా ఊరు పేరు వింటేనే పులకరించి పోతాము

ముత్యాలమ్మ చల్లని చూపులతో ఆనందంగ జీవిస్తాము

 రచన,స్వరకల్పన&గానం:డా.రాఖీ

అలా అలా సాగిపోనీ జీవితం

అలలై కలలై తేలిపోనీ అనవరతం

పంచాలి పదిమందిని అలరించే వినోదం

పొందాలి అందరం అనుక్షణం పరమానందం

మూన్నాళ్ళలొ ముగిసే జన్మకు ప్రతిబంధకాలా

పెదవులపై నవ్వులు చెదరక చితిలోన కాలాలా

1.బిడియాలూ మొహమాటాలు

భేషజాలూ లేనిపోని ఆర్భాటాలు

మునగదీసుకొంటూ మూతిముడుచు చిత్రాలు

పంజరాలు ముసుగులలో అత్తిపత్తి పత్రాలు

మూన్నాళ్ళలొ ముగిసే జన్మకు ప్రతిబంధకాలా

పెదవులపై నవ్వులు చెదరక చితిలోన కాలాలా

2.ఎదుటివారి సంతోషం మనకామోదమై

సాటివారికి సాయపడడమే నిజ వేదమై

ఉల్లమంత ఉల్లాసం వెల్లివిరియ ఎల్లకాలం

ఖర్చులేని ప్రశంసకు మనమవాలి ఆలవాలం

మూన్నాళ్ళలొ ముగిసే జన్మకు ప్రతిబంధకాలా

పెదవులపై నవ్వులు చెదరక చితిలోన కాలాలా

 రచన,స్వరకల్పన&గానం:డా.రాఖీ

గుండెల్లో తడియారిపోయింది

కళ్ళల్లో చెమ్మ ఇగిరిపోయింది

సున్నితమౌ భావాలే సన్నగిల్లిపోయాయి

ఆత్మీయత అన్నదే అడిగంటిపోయింది

1.చెలిమి విరులలోనా తరిగింది పరిమళం

బంధాలూ అనుబంధాలే నేడు వేళాకోళం

సాటి మనిషిపై సహానుభూతియే మృగ్యం

ఎవరికి వారై స్వార్థపుదారైన తీరే దౌర్భాగ్యం

2.ఉత్సుకత ఉత్సాహం కరువైన యవత

అధికారం పరమాధిగా అవినీతిగల ప్రభుత

తాయిలాలతో తలమునకలుగా దేశ జనత

ఎక్కడున్నదో చిక్కక అయ్యో మానవత