రచన,స్వరకల్పన&గానం:డా.రాఖీ

ఎందుకు నేస్తం ఇంతటి జాడ్యం

బ్రద్దలు కొట్టు ఈ మౌన కుడ్యం

అని అనివార్యం వినకుంటె ఆంతర్యం

ప్రణయానికి ప్రాథమ్యం గుండె ధైర్యం

1.మించిపోనీకు ఈ మంచి తరుణం

తీరిపోనీ జన్మ జన్మాల మన ఋణం

తేలికపడనీ తెలుపగ నీ ఎదభారం

విప్పకపోతే మనసిప్పటికైనా ఘోరనేరం

2.నోరార తెలుపు నాపైన నీ ప్రేమ

బిడియాన్ని వదిలేయి అందాల ఓలేమ

నేనోపలేను నీ మూగ ఆరాధన

ఎన్నాళ్ళు కన్నీళ్ళ నా నివేదన

 రచన,స్వరకల్పన&గానం:డా.రాఖీ

ఏది పువ్వో చెలీ ఏది నువ్వో ఎలా తేల్చుకోను

ఏది తూపో ఏది నీ చూపో ఎలా పోల్చుకోను

ప్రకృతిలో ప్రకృతిగా సుందరాకృతి దాల్చావే

అందానికి నిర్వచనంగా నా ఎదుట నిలిచావే

1.నీ కొప్పున చేరాయి నీలాల మబ్బులన్ని

నీ కోకన వాలాయి సీతాకోక చిలకలన్నీ

నవ్వులై విరిసాయి సిరిసిరి మల్లెలన్నీ

తేనెలై కురిసాయి మరుల పలుకులన్నీ

2.బుగ్గలపై మెరిసాయి పగడాల అరుణిమలు

సిగ్గులుగా ఒలికాయి శరదిందు పూర్ణిమలు

కంఠమందు అమరింది దక్షిణావృత శంఖము

కటిన వడ్డాణమైంది  ముంజేతి కనక కంకణం