Monday, September 19, 2022

 రచన,స్వరకల్పన&గానం:డా.రాఖీ


రాగం:షణ్ముఖ ప్రియ


భువనేశ్వరివేమొ నీవు

విశ్వేశ్వరుడే హరుడు

గొప్పెవరన్నది ఈ ఇలలో విప్పి చెప్పేదెవరు

చప్పున ప్రేమతొ మము ముప్పిరి గొనెడివారు


1.మైసమ్మ పోచమ్మ మమ్ముల కాచమ్మ

కనకదుర్గ విజయదుర్గ మా నవదుర్గమ్మా

మహాలక్ష్మి సరస్వతి మా పార్వతమ్మా

పేరుకైతె రక్షించే పేరులుగల మాయమ్మా

కడగండ్లను కన్నీటిని ఎవ్వరు ఆపేరమ్మా


2.భోలాశంకరుడు అభయంకరుడు నీ వరుడు

భక్త వశంకరుడు పాలిత కింకరుడు ఆ శంభుడు

ప్రళయకాల రుద్రుడతడు జ్వలిత ఫాలనేత్రుడు

పేరుకైతె అభయమొసగు నామధేయుడు

అనారోగ్యాలు అకాలమరణాలు ఎవరాపేరమ్మా

 రచన,స్వరకల్పన&గానం:డా.రాఖీ


మేలుకొలుపగలము నిదురించిన వారిని

జాగృత పరుచలేము నిద్రనటించే వారిని

ఎంత వాస్తవమైంది నేస్తం ఈ నానుడి

అక్షర సత్యమనిపిస్తుంది మదికెదురుపడి


1.బిగించుకొని ఉంటే పెదాలు పలికించలేము

మూగనోము పాటిస్తే శబ్దాలు నినదించలేము

తీసకెళ్ళగలిగేము గుర్రాన్ని ఏటి నీటిలో వరకే

తాగనుపో పొమ్మంటే  కళ్ళప్పగించాలి ఊరకే


2.శిలా ప్రతిమలుంటాయి ఉలుకుపలుకు లేక

ఆరోవేలన్నది ఆ దైవపు అప్రయోజన కానుక

సార్థకతే చేకూరాలి మనమంటూ ఉన్నాము కనుక

ఉన్నమాటంటే ఎందుకు ఎవరికైనా సరే కినుక

 రచన,స్వరకల్పన&గానం:డా.రాఖీ


రాగం:మలహరి


కంటతడి పెట్టించకు మా ఇంటి దేవుడా

సీతమ్మ బెంగను తీర్చిన హనుమంతుడా

నిన్ను మేము మరిచావో

మమ్మే నీవు విడిచావో

కుప్పలు తెప్పలుగా స్వామీ మా కెన్నో తిప్పలు

తప్పులు మన్నించి మము గాచితేనే నీ గొప్పలు


1.కొండగట్టుకైతే మేము కోరికోరి వస్తాము

అండగ ఉంటావని నిన్ను విశ్వసిస్తామ

అభిషేకము సలిపి మరీ ఆరాధిస్తాము

మా కేశఖండనములు తప్పక జరిపిస్తాము

కుప్పలు తెప్పలుగా స్వామీ మా కేల తిప్పలు

తప్పులు మన్నించి మముగాచితేనే నీ గొప్పలు


2.బలమెంతో ఎరుగని మహాబలుడవే నీవు

నిన్నే నీవు మరచిపోయే శ్రీరామ భక్తుడవు

సాక్షాత్కరించేవు స్వామీ ప్రత్యక్ష దేవుడవు

అన్యధా శరణం నాస్తి నీవె మాకు దిక్కువు

కుప్పలు తెప్పలుగా స్వామీ మా కెన్నో తిప్పలు

తప్పులు మన్నించి మముగాచితేనే నీ గొప్పలు

 రచన,స్వరకల్పన&గానం:డారాఖీ


గులాబీ రేకు గుచ్చుకుంటె  

గాయమౌతుంది చెలి నీకు

జాబిలే వెలవెలబోతుంది

సాటిరాక నీ మేని ఛాయకు

కచ్చ రేపుతుందినీ మిసిమి సోకు

ఇచ్ఛ పెంచుతోంది రోజురోజుకు


1.మెరిసే తారలు నీ నగవులు

వలపుల రేవులు నీ బిగువులు

కదలాడుతుంటాయి నీ వెంట నగములు

కనిపించినంతనే మనసుకి బుద్ధికి తగవులు


2.ఎదురైతే ఎదలో కల్లోలాలు

మరుగైతే మదిలో ఉప్పెనలు

లయ తప్పదు హృదయమంటె అబద్దాలు

బద్దలైపోతాయి నినుగని ఈర్ష్యతొ అద్దాలు