*తెలుగుభాషా దినోత్సవ శుభాకాంక్షలు*
రచన,స్వరకల్పన&గానం:డా.రాఖీ
రాగం:ముల్తాన్
అడ్డుపెట్టలేరా ఆపన్నహస్తాలు
గడ్డుకాలమొస్తోంది మన తెలుగుకు
పెను తుఫాను వీస్తోంది ఆంగ్లభాషగా
కొడిగట్టబోతోంది మనభాష దైన్యంగా
తెలుగు నాదని తెగువ చూపరా
తెలుగు ఖ్యాతిని జగతి చాటరా
1.పాల్కురికి సోమనతో పొందింది ప్రాభవం
నన్నయ్య కవనంతో చేకొంది వైభవం
రాయల ఆస్థానంలో సంతరించె రాజసం
పోతన భాగవతాన చిలికించె మాధుర్యం
తెలుగు నాదని తెగువ చూపరా
తెలుగు ఖ్యాతిని జగతి చాటరా
2.గిడుగువారి నుడుగుల్లో వాడుక కైతైంది
గురజాడ అడుగుల్లో సామాన్యుల చేరువైంది
కాళోజీ కలం బలంతో బడుగులకు గొడుగైంది
మహాకవుల సేద్యంతో మహిలో మహితమైంది
తెలుగు నాదని తెగువ చూపరా
తెలుగు ఖ్యాతిని జగతి చాటరా