రచన,స్వరకల్పన&గానం:డా.రాఖీ

రాగం:చంద్రకౌఁస్

శ్రీ పదమును వదలను ఆపదమొక్కులవాడ

సంపదలను అడుగను వడ్డికాసుల వాడ

కోరను నిను ఇంకేదీ శ్రీహరి గోవిందా

ముక్తి ఒక్కటే ఆసక్తిర మురారీ ముకుందా

1.నీ కొండల తత్వమే కుండలినీ విద్య

సప్త శిఖరాలే సప్త చక్ర జాగృత శ్రీవిద్య

సుశుమ్నా నాడి పథమె సాధనామోద్య

త్వమేకమేవం స్వామీ సకల సృష్టి మిథ్య

2.ప్రణవ నాదమే విశ్వ మయమై

ప్రాణాయామమే యోగ నియమమై

సర్వేంద్రియాలలోని శక్తి వినిమయమై

సహస్రారపద్మాన నీ దర్శనమై నిరామయమై

 రచన,స్వరకల్పన&గానం:డా.రాఖీ

తూరుపు తెర మీద-ఉషస్సు గీసే తైలవర్ణ చిత్రం నీదే

కృష్ణపక్ష నిశీధిలో గగనాన-మెరిసే తారలు చేసే లాస్యం నీదే

నీతోనె మలచబడినది విశ్వమంతా ఓ గులాబి బాల

నువు వినా కాంచనైతి ఈ జగాన నా ప్రియ జవరాల

1. హేమంత వేళ  పుష్పాలపై తుషార ధవళ కాంతి నీదే

వసంత వనాల పవనాలు మోసే సుమ గుభాళింపు నీదే

సెలయేటి గలగలలలో శ్రవణపేయమౌ మంజులరవం నీనవ్వే

జలపాతపు ఉరుకులలో ఉధృతమై చెలఁగే చైతన్యం నువ్వే

నీతోనె మలచబడినది విశ్వమంతా ఓ గులాబి బాల

నువు వినా కాంచనైతి ఈ జగాన నా ప్రియ జవరాల

2.అమృతాన్ని మించిన అమ్మపాలలో కమ్మదనం నీవే

నల్లనయ్య తలదాల్చిన శిఖి పింఛపు సౌకుమార్యమీవే

ఒడిదాగిన పసిపాకు కలిగే నులివెచ్చని హాయీ నీవే

తొలకరితో ఆర్తిదీర  నెర్రెల  నేల తల్లికౌ  మురిపెం నీవే

నీతోనె మలచబడినది విశ్వమంతా ఓ గులాబి బాల

నువు వినా కాంచనైతి ఈ జగాన నా ప్రియ జవరాల