Saturday, April 11, 2020

ఉన్నదే ఇపుడున్నదే జీవితం
చేజారినదంతా గతం
కాలప్రవాహంలో కరిగెను స్వప్నం
ఎపుడే మలుపు తిరుగునో
జీవిత నాటకం

1.బండ్లు ఓడలైతే ఎంతటి అదృష్టం
ఓడలు బండ్లవడమే ఓ నగ్నసత్యం
జీర్ణించుకోగలేని పరిణామాలు
ఊహించగాలేని ఉత్పాతాలు
నిన్నటి నందనవనమే నేటి స్మశానం
కట్టెలమ్ముకొట్టాయే పూలదుకాణం

2.యథాతథంగా సాగాలి బ్రతుకు రథం
ఎత్తు పల్లాలెన్నున్నా ఉన్నది ఒకటే పథం
శీలలే ఊడినా ఆగదు ఈ పయనం
చక్రమే తొలగినా చేరకతప్పదు గమ్యం
ఆశించినప్పుడే మనషికి ఆశాభంగం
ఎదురీదక స్వీకరిస్తే ఎనలేని ఆనందం


రచన,స్వరకల్పన&గానం:డా.రాఖీ

కత్తిమీద సామురా కలికితో స్నేహము
పులిమీద స్వారిరా పడతితో చెలిమి
ఎప్పడెలా పరిణమిస్తుందో
ఏ మలుపు తిరుగుతుందొ
అత్తిపత్తిలాగా ఎంచరా సోదరా
ఉత్తి తోలుతిత్తిగ భావించరా

1.అందమనే వెలుగు శిఖన-శలభమల్లె మాడిపోకు
తామర రేకుల మధ్యన-భ్రమరమోలె చిక్కుబడకు
మోహమనే పాశానికి నువు కట్టుబడకు
వలపుల మాయల వలలోన పట్టుబడకు

2.పట్టించుకోకున్నా ఆకట్టు కొంటారు
తపసుచేసుకుంటున్నా భంగపరుస్తుంటారు
చొరవగ ఉన్నారనీ సొల్లుకార్చుకోకురా
చనువునిచ్చారనీ చంకనెక్కబోకురా