రచన,స్వరకల్పన&గానం:డా.రాఖీ

ఏ దైవం కోసం చెలీ నీపూజలు

ప్రత్యక్ష దేవిగ నీవే సాక్షాత్కరిస్తే

ఏ కోవెలకరుదెంచగ నీ పరుగులు

నా హృదయ మందిరాన నిను ప్రతిష్ఠిస్తే

నే చేసెద ముప్పొద్దుల ప్రేయసీ ప్రేమాభిషేకం

వరమొసగవె జన్మంతా ఒనరించగ కైంకర్యం

1.ఉషోదయాన తుషార బిందువులేరుక వచ్చి 

మంజుల నాదాల మంజీరాలవ వరుసగ గుచ్చి 

అలంకరించెద మెరియగ నీ పాదాలకు మెచ్చి

ప్రసాదించవే పరువాలు ప్రణయాలు అనుబంధాలు

ప్రమోదించవే రాగాలు యోగాలు యుగయుగాలు

2.నా గుండె మాణిక్యం నీ ఎదకు ఆభరణం

నా మనసు మందారం నీ మెడలో సుమహారం

నా పిడికిలి నీ నడుముకు అమరెడి వడ్డాణం

నా ఊపిరి నీ తనువుకు సౌగంధికా శ్రీ చందనం

విశ్వమంతరించనీ కాలము కడతేరనీ నీదే ఈ జీవితం

తరగని చెరగని గని నా ప్రేమ నీకే చెలీ అంకితం