Wednesday, June 29, 2022

వ్యూహాత్మక మౌని రాజకీయ జ్ఞాని

పాలనా పటిమకు ప్రతీకయే పీవి

గర్విద్దాం మన తెలుగువాడైనందుకు పివీ

విశ్వవిఖ్యాతమే ప్రధానిగా ఆయన కీర్తి తావి

జయహో పాములపర్తి వేంకట నరసింహారావు గారు

శ్రద్ధాంజలి నీకిదే బహుభాషా కోవిదుడా జోహారు


1.కాంగ్రేసు పార్టీకి జన్మాంత సేవకుడవే

ఇందిరా గాంధీకి అనుంగు విధేయుడవే

సంక్లిష్ట సమయాలలో తగు సలహాదారుడవే

అలుపెరుగని సాధనా శూరుడవే

జయహో పాములపర్తి వేంకట నరసింహారావు గారు

శ్రద్ధాంజలి నీకిదే సుకవి కోవిదుడా జోహారు


2.ఆర్థిక సంస్కరణల విప్లవ వీరుడివే

బ్యాంకింగ్ రంగానికి సంజీవరాయుడవే

అగణిత ఉద్గ్రంథ పఠనా,రచనాశీలుడవే

మా ధర్మపురికి చిరకాల ఆప్తమిత్రుడవే


 సిగలొ మందారం-నుదుటి సింధూరం

అధర దరహాసం-నీ హృదయ స్థిరవాసం

కోరలేదు నిను నేస్తం-దొరికిందే నా ప్రాప్తం

నీ పదముల అందియగానైనా

మననీయవే నను జీవితాంతం

నీ చరణ మంజీర మంజుల స్వనమునై రవళించనీ అనవరతం



1.నీ మువ్వల సవ్వడికి నా నవ్వులు జతజేస్తా

నీ దారి వెలుగులకై కను దివ్వెలు వెలిగిస్తా

నీకు అంగ రక్షకుడిగా అడుగడుగున తోడొస్తా

కనుపాపల నిను దాచి రెప్పలనే కప్పేస్తా


2.నీ కాలు కందకుండా అరచేతుల నడిపిస్తా

ప్రతిరోజూ నిను చూడగ పడిగాపులు పడిఛస్తా

ఆత్యాశే నాదైనా నిను పొందగ ఆశిస్తా

మరుజన్మకు సరియని మాటిస్తే  ఇపుడే నే ఛస్తా


Monday, June 27, 2022

 రచన,స్వరకల్పన&గానం:డా.రాఖీ


ఒక గొప్ప నాన్నకు కొడుకును 

మంచి కొడుకులకు నాన్నను 

కొడుకుగా నేను ఎందుకూ కొఱగాను

నాన్నగానూ ఎవరికీ అక్కఱకే రాను


1.మా నాన్న నాకెప్పటికీ రియల్ లైఫ్ హీరో

నాన్నగా నా విలువను లెక్కిస్తే  మాత్రం జీరో

అనురాగాలు ఉద్వేగాలు నా కెంతో దూరం

నాతో అనుబంధం  కుటుంబానికే భారం

మనిషిగా నేనేంతో స్వార్థపరుడను

అంటీముట్టక వ్యవహించే పరుడను


2.నాన్నకెంతో భయపడతూ చిననాడు నలిగాను

నాన్నను నేనను తేడా చూపక మిత్రుడిగా మెలిగాను

నాన్న ఆజ్ఞకు లోబడి బ్రతుకును గడిపాను

స్వేఛ్ఛగా నిర్ణయాలను తనయులకే విడిచాను

కోరడానికేముంది సతీసుతుల ఆనందం మినహా

నాదైన నా వైఖరే తామరాకుపై నీటి బొట్టు తరహా

 

https://youtu.be/QHoS9vSDeTw?si=CxfErztjyKeIwQbL

రచన,స్వరకల్పన&గానం:డా.రాఖీ


రాగం:మధ్యమావతి


నీ వశమైనాను సదాశివా

ఇహ పర వశమే ప్రభూ నీత్రోవ

సదవకాశమే సర్వదా నీ సేవ

సత్కర్మ విశేషమే ఇది మహాదేవా


1.ఇడుముల బడద్రోతువా నీ చిత్తం నా ప్రాప్తం

వరముల కురిపింతువా అది మాత్రం నీ దయాపరత్వం

నీ పదముల నిక వదలను శంభో శంకరా

నీ మననము మరి మానను మహేశ్వరా హరా


2.సులభ సాధ్యుడవనీ భోలావని నిన్నెంచుకుంటిని

దృష్టిని సారింతువని శరణంటిని

నువు ముక్కంటివని

గుడి గుండాలుగా గుండెలనే నువు భావింతువని

తలచిన తడవుగా తక్షణమే ఎదుట సంభవితువని

 రచన,స్వరకల్పన&గానం:డా.గొల్లపెల్లి రాంకిషన్


సాధ్యమే సాధ్యమే సజావైన దృక్పథం

జీర్ణమైతీరుతుంది స్వీకరిస్తే వాస్తవం

సానుకూల వర్తనతో స్వప్నాలు సాకారం

సకారాత్మ భావనతో లభ్యం శాంతి సౌఖ్యం


1.అంతా మనమంచికే అని లోకులు అందురు

మంచి తలచి మంచి పలికి మంచి చేస్తూ అందరు

మంచి చేయ పరిణమించు మనిషే దైవంగా

మంచిని ఆచరించ మనలను రక్షించు 

నిశ్చయంగా


2.సద్భావం సచ్ఛీలం సత్వర్తన సంప్రాప్తం సాధనతో 

సహృయత మృదుభాషణ నగవులు నగలుగా నడవడితో

మంచివి చూస్తూ మంచివే వింటూమంచిగా జీవించగ ఆనందంతో

మంచి ప్రపంచం నిర్మించగలం మనుషులమంతా విశ్వాసంతో

Friday, June 24, 2022

https://youtu.be/UrhhaVQ2S9w

 రచన,స్వరకల్పన&గానం:డా.గొల్లపెల్లి రాంకిషన్


రాగం:కాంభోజి


ఆలిమాట కెదురుచెప్పు మగడేడి జగాన

శ్రీమతి గీత దాటు పతియేడి ప్రపంచాన

హృదయపీఠాన నిన్ను పట్టమహిషి చేసాడే

వైకుంఠానికె నిను మహరాణిని చేసాడే

నీఆజ్ఞ మీరునా శ్రీపతీ… వేంకటాచలపతీ

నీ మాట జవదాటునా మాయమ్మ అలమేలు మంగా ప్రణతి


1.తల్లిచాటు పిల్లలం తండ్రి ఎడల భయభక్తులం

అమ్మా నీ కొంగు చాటుచేసుకొని అంగలార్చెదం

విసుగులేని సమయాన తనకు(నాన్నకు)విన్నవించవే

చిన్నచిన్న మురిపాలను తీర్చగ ఒప్పించవే

నీఆజ్ఞ మీరునా శ్రీపతీ… వేంకటాచలపతీ

నీ మాట జవదాటునా మాయమ్మ అలమేలు మంగా ప్రణతి


2.తీరిక చేసుకొని  పట్టించుకొన మనవే

అక్కున జేర్చుకొని ఆలన చూడ మనవే

చక్కెర పొంగలి పెట్టి వినిపించు మా మనవే

పుక్కిట కప్పుర విడియమెట్టి వినమనవే

నీఆజ్ఞ మీరునా శ్రీపతీ… వేంకటాచలపతీ

నీ మాట జవదాటునా మాయమ్మ అలమేలు మంగా ప్రణతి

 రచన,స్వరకల్పన&గానం:డా.రాఖీ


ఎత్తుకెళ్ళావే నా ఎదనెప్పుడో

చిత్తుచేసావే మదినెన్నడో

పిచ్చోణ్ణి చేసావె రెచ్చగొట్టి

ఎర్రోణ్ణి చేసావె సోకు విందెట్టి

బ్రతికేదెలా ఇక చచ్చేదెలా

పట్టేదెలా మరి వదిలేదెలా

నా పంచ ప్రాణాల నుగ్గబట్టి


1.మరచిపోయే వేళలో కెలికి వెళతావు

కలిసి నడిచేదారిలో కలికీ జారుకుంటావు

తలచేదెలా మరి వగచేదెలా

మెరుపంటి నిన్ను వలచేదెలా

తలపోయకే నా వెతని సోదిలా


2.చెప్పలేను నాపై ప్రేమలేదని

ఒప్పుకోనూ నేనే నీకు ముఖ్యమని

 చొరవ నాదే చెలీ గర్జ్ నాదే

తపన నాకే నీఎడ ఫర్జ్ నాదే

ఔనన్న కాదన్న నిజమెప్పుడూ చేదే

Thursday, June 23, 2022

 రచన,స్వరకల్పన&గానం:డా.రాఖీ


నిను మోహించితి నిను దేహించితి

అహరహము నీకై తహతహ లాడితి

అహము దహించితి దేహము దాచితి

విరహము మించగ నిను తలపోసితి

రాధాలోలా రాస విహారా నాకీయరా శరణాగతి


1.సందేహించక నన్నావహించు

నా వాసనలిక సంగ్రహించు

అద్వైతమను తరహా సంగమించు

త్వమేవ మమనాథమ్ అనుగ్రహించు

మాధవా మహానుభావా నాతో రమించు


2.శిరసావహించితి నీపదధూళి

నువు లేక మనలేను శిఖిపింఛమౌళి

మ్రోగించి మురిపించు అనురాగ మురళీ

సాగించు నాతో రసరమ్య రతికేళి

నీలో లయమవగ హరీ నా మనసే నివాళి

Wednesday, June 22, 2022

 రచన,స్వరకల్పన&గానం:డా.గొల్లపెల్లి రాంకిషన్(రాఖీ)


కవన తెరల చాటున వలపు దాచుకున్నా

మనసు పొరల మాటునా మమత పెంచుకున్నా

కక్కలేక మ్రింగ లేకా సతమత మవుతున్నా 

గుడ్లు మిటకరిస్తూనే రోజులు గడిపేస్తున్నా

చెలీ పొంగుతోంది గుండెలో గోదావరి

ప్రేయసీ రగులుతోంది రావణకాష్ఠం మతిగా మారి


1.విషయమేది రాసినా ఆవు వ్యాసమౌతోంది

ఏ దారికి మారినా నీతావుకు చేర్చుతోంది

సమాసాలన్ని కలిసి నీ ప్రేమస్వామ్యమౌతోంది

ఊహ ఊటగా ఊరి బ్రతుకు రమ్యమౌతోంది

చెలీ పొంగుతోంది గుండెలో గోదావరి

ప్రేయసీ రగులుతోంది రావణకాష్ఠం మతిగా మారి


2.భావమేది పలికినా కళ్యాణ సంబంధమాయే

రాగమేది పాడినా కళ్యాణి అనుబంధమాయే

నీ తలపు తట్టగానే తనువే మయూరమాయే

మనువు సాధ్యమయ్యే దాకా జగమంతా మాయే

చెలీ పొంగుతోంది గుండెలో గోదావరి

ప్రేయసీ రగులుతోంది రావణకాష్ఠం మతిగా మారి

 రచన,స్వరకల్పన&గానం:డా.రాఖీ


నీ పేరులోనే  ఏదో  ప్రకంపనం

నీ రూపులోనూ యమ ఆకర్షణం

నెరవేరునా కల ఈ జన్మకు నీతో నా సహజీవనం

నీవే నీవే నీవే నీవే నీవేలేనా ప్రియభావనం

మంజులా మంజులా నీ ప్రేమరాజ్యానికి నే రారాజులా

మంజులా మంజులా నేనుంటా నీ సిగలో వాడని విరజాజిలా


1.మంజులమంటే కోమలం

మంజులమంటే పరిమళం

మంజులమంటే మనసుకు మత్తుని గొలిపే రసనము

మంజులమంటే ప్రణయము

మంజులమంటే పరిణయం

మంజులమంటే నందనవనిలా తలపించే జీవనం

నాకై నేనే రాసుకున్న నిఘంటువులో

ప్రతి పదము ప్రతి పదార్థం మంజులమే


2.మంజులమంటే దేవళం

మంజులమంటే దైవము

మంజులమంటే ఆరాధించే నివేదించే విధానము

మంజులమంటే హృదయము

మంజులమంటే ప్రాణము

మంజులమంటే కాలము లోకము సకల విశ్వము

మంజులమంటే నాకై నాచే కల్పిత

కవిత్వము

 రచన,స్వరకల్పన&గానం:డా.రాఖీ


లతలా అల్లుకపోయింది నీ స్నేహం

కవితలా అంకురించింది నీపై మోహం

నీ వన్నెచిన్నెలకు మనసు మురిసింది

వలపుల వలనే ఒడుపుగ తను విసిరింది

గుండె సింహాసనంపై రాణిగా నిను కూర్చోబెట్టింది

నన్ను నీ బానిసగా ఎపుడో మార్చేసింది


1.ఇంద్రధనువు కనుబొమలు

చూపులు విరి తూపులు

ఊరించే బూరెలంటి బుగ్గలు

కన్నాను నాసికగా సంపంగి మొగ్గను

తుమ్మెదలను ఆకర్షించే మధుర అధరాలు

నను మైమరిపింప జేసే మదిర దరహాసాలు

గుండె సింహాసనంపై రాణిగా నిను కూర్చోబెట్టాయి

నన్ను నీ బానిసగా ఎపుడో మార్చివేసాయి


2.పైట దాటు పయోధరాలు

చాటులేని నడుము మెలికలు

చాటుతున్నవి వాటి పాటవాలు

నాభిమాత్రం ఒంటిగానే చేసే సవాలు

అరటిబోదెలైనాయి నీ ఊరువులు

తమలపాకులనిపించే లేలేత పాదాలు

గుండె సింహాసనంపై రాణిగా నిను కూర్చోబెట్టాయి

నన్ను నీ బానిసగా ఎపుడో మార్చివేసాయి

Monday, June 20, 2022

 

https://youtu.be/GtA0YZayug4?si=oediKDWMHtyhmSud

రచన,స్వరకల్పన&గానం:డా.రాఖీ


అదిగో పులియన ఇదిగో తోకయనక యువత

రాజకీయచదరంగం జిత్తులనెదిరించగ  మీ విజ్ఞత

కీలుబొమ్మలై తోలుబొమ్మలై కొమ్మకాయక

మనకంటూ ఉంటుందిగా నిటారుగా వెన్నెముక


1.రెచ్చగొట్టు వాదాలకు గొడుగు పట్టక

చిచ్చుపెట్టు చర్యలకు నడుం బిగించక

ప్రగతిశీల దారులలో పయనించే దిశగా

విచక్షణతొ ప్రవర్తించి ముందడుగేయగా


2.వ్యక్తిత్వం కుటుంబం  జాతి నిర్మాణం లక్ష్యంకాగా

సఛ్ఛీలం సద్వర్తన సదాశయం సర్వదా ముఖ్యంగా

ఓటును వాడాలి పదునైన ఆయుధంగా

అండగ నిలవాలి మన జెండా కొరకై అనవరతంగా

Sunday, June 19, 2022

 రచన,స్వరకల్పన&గానం:డా.రాఖీ


రాగం:భీంపలాస్


ఎంతకూ తీరకుంది నా దాహం గంగాధరా

ఏమిటో ఆరకుంది నా మోహం చంద్రశేఖరా

నా గళముకు నిగళమేల గరళకంధరా

నా కలముకు తపనలేల శూలధరా

వర్షించరా నీ దయ సహృదయా 

నమఃశివాయ ఓం నమఃశివాయ


1.వారాశిగా భావాలనే తలపోసితి

రాశిగా నే కవితలెన్నో వ్రాసి పోసితి

చిత్తశుద్ధిగా శివా నీ పూజనే చేసితి

ఆత్మతృప్తి లేకనే భవా అల్లలాడితి

మెప్పించలేకపాయే నా కావ్యాలు సాహిత్య కారులను

కదిలించ లేకపాయె నా గేయాలు సామాన్య శ్రోతలను

వర్షించరా నీ దయ సహృదయా 

నమఃశివాయ ఓం నమఃశివాయ


2.మార్ధవాన్ని గాత్రంలో కూర్చవైతివి

సంగీతాన్ని శాస్త్రంగా  నేర్పవైతివి

ఊటలాగ కఫమెంతో ఊరజేస్తివి

కంఠనాళాలనే కపర్దీ కరకుజేస్తివి

గొంతు జీరబోవునాయే ఎలుగెత్తి పాడితే

తాళమెచటొ తప్పునాయే ఊపుగా ఊగితే

వర్షించరా నీ దయ సహృదయా 

నమఃశివాయ ఓం నమఃశివాయ

 రచన,స్వరకల్పన&గానం:డా.రాఖీ


ఒక వెర్రిబాగులోడే నాన్న

స్వార్థపరుడెవరున్నారు తనకన్నా

తన కోర్కెలకోసమే నిను కన్నా

విలనే తానై తన కలల హీరోగా నిను కన్నా

చేతకాని వాడనిపించుకున్న

ఈతరాని వాడని ముద్రవేయించుకున్న


1.తెప్పలు తగలేసే తనయులకై

తీరం చేరవేసే సరంగుతానై

గడ్డాలనాడొక తెడ్డుజూపు కొడుకులకై

అడ్డాలు పడకుండా అరచేతులుంచినందులకై

ఈసడించబడుతున్న

విలువను కోల్పోతున్న


2.బాధ్యతలెరుగని బద్మాషులున్నా

హక్కులు మిక్కిలిగా గుంజుకున్నా

తండ్రిగ చెప్పుకొన్న తలవంపులనుకున్నా

ఎదురుగ కనిపించినా మొకం తిప్పుకున్నా

ఎదను సమాధాన పర్చుకునే

మేకపోతు గాంభీర్యం ప్రదర్శించే

 రచన,స్వరకల్పన&గానం:డా.రాఖీ


నాదను కొంటేనే కలవరం

కాదనుకొంటే మనం ఎవరికి ఎవరం

ఇంతకన్న ఎలా తెలుపను నా ఎద వివరం

అలజడి రేగింది నీవల్లే నా ప్రశాంత మానస సరోవరం


1.నీ తలపులతో ఔతుంది నా మది చిత్తడి

నీ ఊహలకే దూకుతుంది భావావేశం మత్తడి

నీదేలే నా హృదయం మేలిమి పుత్తడి

చేదేలే నువు కాదంటే ఆరదు నా కంటతడి


2.ఎప్పుడు ముడివడిందో మనకీ చిక్కుముడి

ఇచ్చేసా ఏనాడో నీకు నిలువుదోపిడి

ఓపలేను ఆపలేను గుండెలోనీ రాపిడి

త్రెంచుకోకు చంపమాకు మనబంధం పొరబడి

Friday, June 17, 2022

 రచన,స్వరకల్పన&గానం:డా.రాఖీ


అరవై స్తంభాల ఆలయమంటే నీదే వేంకటేశ్వరా

మా ధర్మపురిలో నిలువెత్తు విగ్రమున్నది నీకే శ్రీనివాసుడా

ఆగ్రహమే ఎరుగవు నీవు అనుగ్రహం మినహా

చిద్విలాస మూర్తిగ వెలిసావు ఎదన సిరితో సహా

ప్రణామాలు నీకివే వాంఛితార్థదాయకా

ప్రమోదాలు నీవల్లే రమా నాయకా


1.గోదావరి జలములతో నిత్యాభిషేకాలు

ప్రతి శుక్రవారము నీకు క్షీరాభిషేకాలు

పలు వన్నె చిన్నెల పట్టు వస్త్రా లంకారాలు

భక్తవరుల మనోభీష్టాలైనవి నీ ఆభరణాలు

తులసిదళాలతో పలువిధ విరులతో అల్లిన మాలలు

కళ్ళు రెండుచాలవు కనగ మదిన ఆనంద హేలలు


2.ఏటేటా జరిగేను బ్రహ్మోత్సవాలు కళ్యాణోత్సవాలు

కనుల పండుగ చేసేను కోనేటి తెప్పోత్సవాలు డోలోత్సవాలూ 

శివ నరసింహులతో బాటు రథోత్సవాలు

ఆర్జిత సేవలు అర్చనలు భోగాలు

నీకు అంగరంగ వైభోగాలు

కళ్ళు రెండుచాలవు కనగ మదిన ఆనంద హేలలు

Wednesday, June 15, 2022

 రచన,స్వరకల్పన&గానం:డా.రాఖీ


తరించిపోయింది నీ పాదాలు కడిగిన కడలి

పరవశించిపోయింది నీపై వెన్నెల కురిసిన పున్నమి జాబిలి

వయ్యార మొలికింది  నీ మేను తాకిన చిరుగాలి

అపురూపమైన నా నెచ్చెలి 

నీవు నాదానివన్న ఊహకే మనసు ఎగిరిపోతోంది దూదిపింజలా తేలితేలి


1.తహతహలాడుతుంది గులాబీ

నీ జడలో తానొదిగి గుర్తింపు పొందాలని

తపనేపడుతుంది పచ్చలహారం

నీ ఎదపై  చేరగ హెచ్చరిల్లు తన అందాలని

తానేం తక్కువతింది కోక నిను చుట్టుకోక 

తన బ్రతుకే వృధా కనుక నీకే చెందాలని

తన్మయమొందుతోంది మనసు అనుక్షణం తలపోస్తూ నీతో పొందు ఆనందాలని


2.గోదారి గట్టున ఉన్న ఇసుకతిన్నెలన్ని 

వేచిచూస్తుంటాయి మన కబుర్లకోసమని

రాదారి పక్కనున్న తురాయిపూవులన్ని 

దారి కాస్తుంటాయి  మనపై కురుద్దామని

పావురాలు బ్రతిమాలుతాయి 

ప్రేమరాయబారాలు   తాము నెరపు తామని

ఎరిగితివా ప్రియా గొప్పకవుల కలాలు సైతం 

మన ప్రణయం కావ్యాలుగా రాయ గోరాయని

 సౌందర్య నిధినీవే

నా జీవన కౌముదివే

నిశీధులన్ని నీవల్లే ప్రకాశించినాయి

మధురానుభూతులెన్నో సంప్రాప్తమైనాయి

కొనసాగింతునే…నా ప్రేమ ఏడు జన్మలదాకా

క్షణమైనా మనలేనే చెలీ నీతోడు లేక


1.నిర్జన ఎడారులే  నిన్నటి నా బ్రతుకంతా

బ్రహ్మజెముళ్ళే నే నడిచిన దారంతా

అలమటించి పోయాను ప్రేమరాహిత్యంతో

పరితపించిపోయాను నే తీరని దాహంతో

శ్రావణ మేఘమై అనురాగం కురిసావే

శరదృతువు చంద్రికవై ఆహ్లాదం పంచావే


2.నిండైన జాబిలికి చెట్టుమచ్చనే అందం

 నీ నగు మోముకు మోవి పుట్టుమచ్చ అందం

అందాలన్ని ఒక్కదిక్కే కుప్పబోస్తె నీ చందం

కనుగిలుపక నిన్ను చూస్తే అంతులేని ఆనందం

రాయంచలు వయార మొలుకు నీ కులుకులు నేర్వంగా

రాచిలుకలు పలుకులు చిలుకు గురువు నీవని గర్వంగా

Tuesday, June 14, 2022

 రచన,స్వరకల్పన &గానం:డా.రాఖీ


వ్యర్థపు వ్యక్తులకు జన్మెందుకిస్తావో

ప్రయోజనం లేని మనుజుల ఎందుకు పుట్టిస్తావో

అర్థంపర్థమేమైనా ఉందా స్వామీ నీచర్యలకు

పైశాచికానందమేనాప్రభూ నీ వికృత క్రతువులకు

దేవుడంటె దేవుడిలా ప్రవర్తించు స్వామి

నిను నమ్మివారి బాధ్యత నిర్వర్తించవేమి


1.భరించగరాని బాధలు తగిలింతువేల

కనీవినీ ఎరుగనట్టి కఠినరీతి శిక్షింతువేల

తప్పుచేయడం మాకు సరదానా ఏమి 

వక్రబుద్ది పుట్టేల ప్రేరేపింతువెందుకు స్వామి

దోషాలు ద్రోహాలు నీవు చేసుకుంటూ

తగినశాస్తి చేసానంటూ నీవే నవ్వుకుంటూ


2.కారణం మేమే ఐతే ఏకంగా మరణశిక్ష వెయ్యి

ముందువెనక చూసుడెందుకు ఇపుడే చంపెయ్యి

చావుకైతె వెఱించిందిలేదు బ్రతికిందే ఇక చాలు

దైన్యంగా నూరేళ్ళకంటే అనాయాస మృతి మేలు

కోరింది ఏదీ తీర్చన దాఖలాయే లేదు

మరిమరి కోరను స్వామి ఆఖరిదిది తీర్చేద్దూ

Monday, June 13, 2022

 

https://youtu.be/wv64meWEL20?si=MeZteI011xYDBQko

రచన,స్వరకల్పన&గానం:డా.రాఖీ


భవతారకం నీ నామం నమఃశివాయ

పరమ ఔషధం నీ తీర్థం నమఃశివాయ

సులభ సాధ్యం నీ అర్చనం నమఃశివాయ

కైవల్య సాధనం నీ ధ్యానం నమఃశివాయ

నమఃశివాయ నమఃశివాయ నమఃశివాయ నమఃశివాయ


1.శుభ సూచకం నీ దర్శనం నమఃశివాయ

అఘనాశనం నీ స్పర్శనం నమఃశివాయ

అంజలి సలిలం నీ అభిషేచనం

నమఃశివాయ

పత్రి దళం నీకు ప్రియ సమర్పణం

నమఃశివాయ

నమఃశివాయ నమఃశివాయ

నమఃశివాయ నమఃశివాయ


2.సుస్వర ధారణం నీ పదసేవనం నమఃశివాయం

నశ్వర భావనం నువు వినా జీవనం

నమఃశివాయ

పంచాక్షరీ మంత్రం పరమ పవిత్రం

నమఃశివాయ

అక్షరమగు అక్షరాలు లక్ష్యము నెరవేర్చనీ మోక్షమునీయనీ నమఃశివాయ

నమఃశివాయ నమఃశివాయ

నమఃశివాయ నమఃశివాయ

 కడిగిన ముత్యము నీ రూపం

స్వచ్ఛని స్ఫటికము నీ అందం

విరిసిన పుష్పము నీ దరహాసం

అనురాగ రంజితం నీమానసం

నవమోహిని నీ దర్శనం ఉత్తేజ జనితం

ప్రియభామిని నీ స్పర్శతొ అమరత్వ భావనం


1.సుప్రభాత శుభవేళ ఇల్లూ వాకిలి తీర్చిదిద్ది

ముంగిట ముగ్గేసి గడపకు పసుపు రాసి కుంకుమనద్ది

అభ్యంగనమొనరించి కురులారగ నెట్టెము జుట్టి

తులసి కోట చుట్టు దిరిగి తులసిని అర్చించగ

నవమోహిని నీ దర్శనం ఉత్తేజ జనితం

ప్రియభామిని నీ స్పర్శతొ అమరత్వ భావనం


2.చేతిలొ పాలచెంబు కొప్పులొ మల్లెచెండు పరవశమొందించు

నల్లంచు తెల్లచీర నాభికనగ జార

మునివర్యులనైనా ముగ్గులోకి దించు

ముద్దు ముచ్చట్లతో వింత కౌగిలింతలతో ఎదలానందించు

శృంగార తరంగాల అంగాలు అంగలార్చ కైవల్యమందించు

నవమోహిని నీ దర్శనం ఉత్తేజ జనితం

ప్రియభామిని నీ స్పర్శతొ అమరత్వ భావనం

Saturday, June 11, 2022

 కానుకగా నీకీయనా నగిషీలు కలబోసిన పసిడి గాజులను

బహుమతినందీయనా మెరిసే రవ్వలు పొదిగిన హారాలని

అలంకరించనా మంజులమగు నీ పదాల స్వర్ణ మంజీరాలని

మణిమయ మకుటమే తలనుంచనా విశ్వైక సుందరి నీవేనని


1.జాంబవంతునితో పోరి కొనితేనా భామామణీ శమంతకమణిని

బొందితోనే అమరావతి చేరి ఎత్తుకరానా పారిజాత తరువుని

ఇంద్ర ధనుసునే దించి చీరగ అందించి

నందింప జేయనా డెందముని

అలకాపురినే నీపరం చేసి మురిపింపగజేయనా నీ మురిపెముని


2.కోహినూరు వజ్రమే నీవైతే మరొకటెలా సంపాదించను

తాజ్ మహల్ సౌందర్యం సరిరాదే

అద్భుత హర్మ్యమేది నిర్మించను

మానవ సాధ్యమేదైనా తులతూగదు

కానుకనీయగా నీ జన్మదినమును

నభూతోనభవిష్యతి నామతి నీకెపుడో ఇచ్చేసితిగా నా మనమును






 రచన,స్వరకల్పన&గానం:డా.రాఖీ


నాకము నరకమని మరి లేవు నరునికి 

శోకము సౌఖ్యము ఏకమే నీ భక్త వరునికి

నిశ్చింతయు నీ చింతయు అపర స్వర్గ ధామము

ఆరాటము అసంతృప్తి అవనిలొ యమ లోకము

నడుపుము నను గోవిందా నీ దివ్య పథము

తిరువేంకటనాథా నిను వినా వలదే పరమ పదము


1.ఋణము తీర్చుకొనుటకే సతీ సుతుల బంధాలు

వడ్డీకి వడ్డీ వేసి గుంజుకొని నంజుకతిను చందాలు

దృష్టిని నీనుండి మరలించెడి మోహ గంధాలు

నీటి బుడగ నిలుచునంత సేపటి ఆనందాలు

నడుపుము నను గోవిందా నీ దివ్య పథము

తిరువేంకటనాథా నిను వినా వలదే పరమ పదము


2.వ్యాధులుగా బాధించును పూర్వజన్మ పాపాలు

వెంటాడి వేధించును ఆనాటి అర్భకులిచ్చిన శాపాలు

అశాంతి అలజడి వత్తిడి నిలువెల్లా దహించు తాపాలు

అడుసు త్రొక్కి జలము కోరునటుల ఈ పరితాపాలు

నడుపుము నను గోవిందా నీ దివ్య పథము

తిరువేంకటనాథా నిను వినా వలదే పరమ పదము

 రచన,స్వరకల్పన&గానం:డా.రాఖీ


నువు చెప్పిందేమిటి సాయి

మరి చేస్తున్నదేమిటి సాయి

నీ మాటకు చేతకు పొంతన ఐతే లేదోయి

కరుణను మాత్రం వర్షిస్తుంది నీకనుదోయి

సాయిబాబా షిరిడీ సాయిబాబా

ఎంతకాలం నీ గారడీ సాయిబాబా


1.షిరిడీలో అడుగిడితే రావంటివి ఆపదలు

నా సమాధి తాకినంత  తొలగునంటివి వేదనలు

తలువగనే పిలువగనే వచ్చెదవన్నవి అనృతాలు

నమ్మితె కోర్కెలు తీర్చెదవన్నవి కోతలే కోతలు


2.శరణన్నవారికి దక్కేదేముంది నేనే ఉదాహరణం

దిక్కునీవని మ్రొక్కేవారి భారం మోసావ ఏదీ తార్కాణం

ఆదుకున్నదీ చేదుకున్నదీ లేదన్నదే

నా ఆరోపణం

త్రికరణ శుద్ధిగ విశ్వసించాను చేయాలి నీవే నిజనిర్ధారణం

Wednesday, June 8, 2022

 రచన,స్వరకల్పన&గానం:డా.రాఖీ


చిత్తకార్తి కుక్కకన్నా హీనం

గోతికాడి నక్కకన్నా నీచం

ఒక్కటైనా లేదు నీలో మనిషి లక్షణం

భువికి భారం నీఉనికిఘోరం  ఏ క్షణం


1.ఏకపత్నీ వ్రతుడు రాముని జన్మభూమి ఇది

చతుర్విధ పురుషార్థాలను ఆచరించే

పుణ్యస్థలమిది

నా దేశం ప్రపంచానికే ఆదర్శం

నా దేశం అంటేనే విశ్వసందేశం

సతి అనుమతి లేనిఎడల ధర్మరతియూ నేరమే

బలాత్కారం మానభంగం పరులపై అతి క్రూరమే


2.వావి వరుసలు జాలి కరుణలు  నీకడ మృగ్యమే

మానవీయ విలువలన్నవి ఎరుగనీ 

వికృత మృగమువే

నీవు చేసే భీభత్సం మెచ్చదే సమాజం

నీది ఎంతటి కుత్సితం మారదా నైజం

మాటు వేసి వేటాడే అకృత్యాలే దారుణం 

చట్టరీత్యా  తగినశాస్తిగ శిక్ష ఒకటే నీకు మరణం

 రచన,స్వరకల్పన&గానం:డా.రాఖీ


చీరకట్టులోనే ఉంది సుదతి సింగారం

చేలముతో ఇనుమడించు ఇందువదన సౌందర్యం

కనికట్టు చేస్తుంది భారతీయ వనిత కట్టుబొట్టు

కట్టిపడవేస్తుంది కాళ్ళకాడ మగవాడిని ఎరిగి ఆయువుపట్టు


1.చీరలు పలు కొలతలు వన్నెలు నగిషీలు అంచులు కొంగులు నాణ్యతలు

చేనేత పట్టు సిల్కు సింథటిక్కుల సారీలు పెక్కురీతులు

వివిధ సందర్భాలకు అమరి అలరెడు

తరుణుల ప్రియతములు

దాయాదుల విరోధానికి భాగవత విలాసానికి హేతువులు


2.ప్రాంతాలవారిగా సంతరించుకుంది 

చీర ప్రత్యేకత

కట్టుకొనుటలో ఆకట్టుకొనుటలో చీరలకుంది విశిష్టత

మరాఠీ గుజరాతీ మార్వాడీ మళయాళి తెలుగుది దేనికదే ఘనత

దాచిదాచక అందాలతొ కనువిందు చేయుటే చీర మార్మికత

Tuesday, June 7, 2022

 రచన,స్వరకల్పన&గానం:డా.రాఖీ


నా కలానికి బలమిచ్చే విటమిన్ల టానిక్ నువ్వు 

నడుమన నను ముంచక ప్రేమతీరం చేర్చే టైటానిక్ నువ్వు

ఏడాది పాటూ నాలో పల్లవించే నవ వాసంతం నువ్వు

నెలపొడుగునా పున్నమిలా వెన్నెల కురిసే జాబిలి నువ్వు


1.ఏ మూలో నీ హృదయంలో చోటిచ్చిన మైత్రివి నువ్వు

కవితను పొంగి పొరలింపజేసే వైచిత్రివి నువ్వు

నా జీవిత నాటకంలో ప్రముఖమైన పాత్రవి నువ్వు

ఎండకు వానకు తోడైనిలిచి ననుకాచే

ఛత్రము నువ్వు


2.నన్ను నేను దిద్దుకునేలా నా మదికి అద్దము నువ్వు

గెలుపు గిరుల నెక్కించే ఎత్తైన నిచ్చెన నువ్వు

నా నాలుక పైన ఆడే లల్లాయి పాటవు నువ్వు

నాకు వేడుక కలిగించే నృత్త నయన జంటవు నువ్వు

 రచన,స్వరకల్పన&గానం:డా.రాఖీ


ఏదనేదో వెలితిగా

మనసంతా నలతగా

పాట రాయని ప్రతిపూట

కలం కదలక అలసట


1.నవ్యత నందించేలా

రమ్యత సాధించేలా

ధన్యతను పొందేలా

భావమొకటి రాదేలా


2.వస్తువుల జబర్దస్తీ

పద సంపద నా ఆస్తి

గేయానికి హాయితొ దోస్తీ

కృషితో దుర్భిక్షం నాస్తి

Monday, June 6, 2022

 రచన,స్వరకల్పన&గానం:డా.రాఖీ


అప్పగింతలంటే కళ్ళప్పగింతలే

సాగనంపుడంటే కన్నుల చెమరింతలే

నోముల పంటగా కన్న కూతురిని-పెళ్ళికూతురిని

అల్లారు ముద్దుగా పెంచుకున్న చిన్నారిని

ఆఖరి ఘట్టానికి వచ్చిందిక కళ్యాణం

ఒక అయ్యచేతిలో బొట్టిని పెట్టే తరుణం

మారుతుంది తానిక అత్తింటి తోరణం

తీరేనా ఎప్పటికీ పుట్టింటితో రుణం


1.పుట్టింది మొదలుగా ఇంటికి మహలక్ష్మి

ఇంటిల్లిపాదిని ఏలే ఏకైక యువరాణి

ఆజ్ఞలు వేస్తుంటే పాటించుటే పరిపాటి

నవ్వులు రువ్వుతుంటే మెరుపు వెలుగులేపాటి

మారుతుంది తానిక అత్తింటి తోరణం

తీరేనా ఎప్పటికీ పుట్టింటితో రుణం


2.ఆడింది ఆటగా పాడింది పాటగా

తనమాటే వేదవాక్కు

అమ్మానాన్నలకు ఆరిందానిలా తానే పెద్ద దిక్కు

బంగరు తల్లిగా బుంగమూతి పట్టడం తన జన్మహక్కు

మంచి కోడలనే మాట మా గారాల పట్టికి ఎలాగూ చిక్కు

మారుతుంది తానిక అత్తింటి తోరణం

తీరేనా ఎప్పటికీ పుట్టింటితో రుణం

 

https://youtu.be/qDxPaJnN2hI?si=nielkdQUjIzQeiMv

రచన,స్వరకల్పన&గానం:డా.రాఖీ


ఈ మేను లేకపోతె మాత్రమేమి సాంబ శివా

నేనుగా నీలో అజరామరమై మనలేనా సదాశివా

ఉన్నంత వరకు దేహమున్నంతవరకు చేయనీ నీ సేవ

నిను చేరెడి తోవలోనె నను నడిపించరా మహాదేవా


1.రేపు మాపని మా పని ఆపని వేలుపు నీవని

నమ్మి నాను నెమ్మనమున నమో పినాకపాణి

దారాసుత బంధాల నుండి విముక్తి చేయరా కపర్దీ

ఈదలేను చేదుకో  భవ జలధిని కళానిధీ


2.లింగాకారా గంగాధరా త్రయంబకా ప్రభో మృత్యుంజయా

నర్తించరా నటరాజా నా నాలుకపై నమో నమఃశివాయ

పరమేశ్వరపరమై వరలెడు జన్మ నీవొసగెడి వరమయా

 శివమేకమై శివైక్యమై శివోహమై మననీ నను దయామయా

Friday, June 3, 2022

 రచన,స్వరకల్పన&గానం:డా.రాఖీ

సంకటాలెన్ని స్వామి చిన్ని అంకురానికి

బాలారిష్టాలే బాలాజీ ప్రతి బీజానికి

ఒడుదుడుకులు తట్టుకొని చెట్టుగ గట్టెక్కుటెంత కష్టము 

మనిషి లక్ష్యమే వృక్షపుగతియైతే జన్మధన్యమగుట తథ్యము

తిరుమలేశ నీ రచనా కౌశలాన సృష్టి సమస్తం కడు విచిత్రము


1.క్రిములు తొలిచి ఒళ్ళు గుల్ల చేసే ప్రమాదము

సారవంతమైన నేలన లోతున నాటితేనే పటుత్వము

తగినంతగ జలమందగ మొలకెత్తును జీవిగ విత్తనము

మొక్కగ ఎదుగుతూ మానుగ మనుదారిలొ ఎందరిదో పెత్తనము


2.కంచె ఒకటి పశువుల నోటికందకుండ కుజమును కాయాలి

చీడ పీడలన్నిటిని విధిగా ఎదుర్కొని 

పూలు కాయలు ఫలాలు కాయాలి

తరువు తనువులొ అణువణువు పరుల కొరకె దారపోయాలి

తన కొమ్మలొ భాగమే కామాగా మారి

నరికే గొడ్డిలి  కొమ్ముకాయాలి

 రచన,స్వరకల్పన&గానం:డా.రాఖీ


ఎలా తెలుసుకోను నేనంటే నీకు ప్రేమెంతో

ఎలా కొలువగలను నీమదిలో నా విలువెంతో

నీవెరుగనట్టుగా మారుదునా వేగులవాడిగా

నీచుట్టే సంచరించనా చేరినీ

ఊపిరిలో ఊపిరిగా


1.కవిత రాయు సమయాన

 కలం మొరాయించు వేళ

రాయించనా సూచించనా రాయంచనై

గుణదోషాలు నిర్ణయించనా నిస్పక్షపాతినై

నీ భావాల స్పష్టత నేనై

అనుభవాల ద్రష్టను నేనై


2.నీ మేనుకు మెరుగులు దిద్దగా

వలువలు వన్నెలకు నా శ్రద్ధనద్దగా

అందాలు చిందగా డెందమా నందమొందగా

నా వేడుక నీ వాడుకగా పరిణమించగా

నీలో నేను ప్రతిఫలించగా

స్వప్నాలే సతతం ఫలించగా

Wednesday, June 1, 2022

 రచన,స్వరకల్పన&గానం:డా.రాఖీ


ప్రాణమున్న పాటను నేను

పరిమళాల విరి తోటను నేను

మానవత మనగలిన చోటును నేను

విజయానికి దారితీయు ప్రగతి బాటను నేను

పాటే ప్రతి పూట సాపాటై పరిపాటై నా నోట


1.పాటగ పరిణమించు ఎదన నాటిన సంఘటన

పాటగ ఉదయించు మదిని మీటిన 

పర్యటన

పాటను ఆలపించు హృదయంగమమై  పటిమ

పాటే ప్రతి పూట సాపాటై పరిపాటై నా నోట

పాటే నా తూట సమ్మెట తప్పెట చేట  తరగని ఊట ఎగసే బావుటా


2.పాట ప్రేమ ఆలంబన ఆరాధన

పాట విరహ వేదన విషాద నివేదన

పాట భావ ప్రకటన వాదన వంతెన 

పాట ఆత్మ శోధన పరయోగ సాధన

పాటే ప్రతి పూట సాపాటై పరిపాటై నా నోట

పాట నా పబ్బతి వినతి శరణాగతిగా నాకు బాసట

 రచన,స్వరకల్పన&గానం:డా.రాఖీ


పట్టుకోలేవు వదిలిపోలేవు

నీవు నాప్రాణం నేను నీకు ప్రహసనం

దోబూచులాడేవు న్యాయమా

దొంగాట లాడేవు చెలీ ధర్మమా


1.ఆన్ లైన్లో లేంది చూసి పలకరిస్తావు

బ్లూ టిక్కులు లాస్ట్ సీన్ దాచేస్తావు

స్పందన లేదనను స్ఫూర్తివె కాదనను

యథాలాప మైత్రికే నే వ్యధ చెందేను


2.ఆచితూచి వ్యాఖ్యలను నాపై రాస్తావు

నీ కవితలు వెతలను కనుమరుగే చేస్తావు

నా మస్తకమే నీకెపుడు తెరిచిన పుస్తకం

నీ మనస్సంద్రమే అంతుచిక్కనీయని

అగాథం

 రచన,స్వరకల్పన&గానం:డా.రాఖీ


చక్కబెట్టుకోవాలి ఇంటిని దీపమున్నప్పుడే

చక్కదిద్దుకోవాలి బ్రతుకుని జీవించి ఉన్నప్పుడే

ప్రదర్శించితీరాలి ప్రతిభని అవకాశం వచ్చినప్పుడే

మేలుచేయగలగాలి జనులకి ఉన్నంతలో ఇప్పటికిప్పుడే

ఎపుడు ముంచకొచ్చునో మరణము

మించిపోనీకు మంచిదిదే తరుణము


1.ప్రభాతాన విరియకుంటె కమలము

ఆగాలి మరుసటి ఉదయానికి

వసంతాన కూయకుంటె వాసంతము

వేచిచూడాలి మరుఏటి ఆమనికి

గొంతువిప్పి రంజింజేయాలి మధుర గాత్రము వేదిక దొరికినప్పుడే

ప్రదర్శించితీరాలి ప్రతిభనిబ

అవకాశం వచ్చినప్పుడే

ఎపుడు ముంచకొచ్చునో మరణము

మించిపోనీకు మంచిదిదే తరుణము


2.తూర్పార పట్టాలి పంటను వాలుగా గాలి వీచినప్పుడే

వడియాలనెండ బెట్టాలి ఆరుబయట

మబ్బులు పట్టనప్పుడే

వాయిదా వేయకనే సాయపడాలి వెంటనే బుద్దిపుట్టినప్పుడే

మేలుచేయగలగాలి జనులకి నీకడ

ఉన్నంతలో ఇప్పటికిప్పుడే

ఎపుడు ముంచకొచ్చునో మరణము

మించిపోనీకు మంచిదిదే తరుణము