రచన,స్వరకల్పన&గానం:డా.రాఖీ

ఏ శిల్పి చెక్కినాడో

బ్రహ్మనే మలిచాడో

అంగాంగ సౌష్ఠవం చొంగకారేలా

దేహసోయగం కనినంత గుండె జారేలా

1.పాలరాయిని వాడాడో

పాలకడలిన ముంచాడో

వెన్నెలనే లేపనంగా ఒళ్ళంతా పూసాడో

మల్లెలనే బతిమాలి తనువుకే అద్దాడో

వంపుసొంపులెంతగానో ఇంపాయెగా

వన్నెచిన్నెలెన్నెన్నో అన్నీ సమకూరెగా

2.జఢుడైన చెలరేగేను

యతికైన మతిపోయేను

యవ్వనం వనమల్లే పచ్చగా విరిసింది

పరిమళం మనసంతా  ఆక్రమించింది

విరహోత్కంఠితయై స్వాగతించగా

జన్మయే తరించదా సంగమించగా

రచన,స్వరకల్పన&గానం:డా.రాఖీ

ప్రమద సామీప్యం కనులకు దేదీప్యం
సుదతి సావాసం మనసున మధుమాసం
అతివ సాన్నిధ్యం శుక్లపక్ష కార్తీకం
ముదిత సౌరభం జీవితానికే శుభం

కంజముఖిని కాంచగా మది రంజిస్తుంది
అలివేణి అగుపిస్తే దివే భువికి వస్తుంది
సుజఘనను చూడగా మతిచలించిపోతుంది
కలశస్తని కలికిని తిలకిస్తే శ్రుతిమించి రాగమౌతుంది

వనితే తలపున వెన్నెల్లో ఆడపిల్ల
మగువే కలలో మధురమైన రసగుల్ల
కోమలి ఊహల్లో ఎద ప్రియబాంధవి
తరుణే ఎదుటన జగములగను జనని సకల జగజ్జనని 

గాజు కన్నా పారదర్శకం
గంగ కన్నా పరమ పునీతం
వజ్రాన్ని మించిన దృఢతరం
మన స్నేహితం అది శాశ్వతం

1.అశించుటకేమి లేనిది
పంచుకొనగ ఎంతో ఉన్నది
ఎద గానం కోరుకున్నది
మన మైత్రి అన్నది చితిదాటనున్నది

2.ప్రణాళికతొ సాధ్యపడనిది
అనూహ్యంగ ప్రాప్తమైనది
నిర్వచించ వీలుకానిది
మనదైన చెలిమి అదే మనకు కలిమి

3.కృతజ్ఞతను కాంక్షించనిది
మన్నింపును వాంఛించనిది
అభ్యర్థనలే అపేక్షించనిది
మన సౌరభం సదా సులభం