రచన,స్వరకల్పన&గానం:డా.రాఖీ

గాయపరచుట ఎంత తేలిక
కత్తులు కటారులేవీ వాడక
ఒక మాట చాలు ఈటెలాగా
ఒక చేష్టతోనే  గుండె మండగ

1.ఎదుట పడితే తప్పుకొంటూ
గొప్పగా నను చెప్పుకొంటూ
శల్య సారథ్యమై శూల ప్రతిఘాతమై
అడ్డుపుల్లలు అడుగుఅడుగున వేసుకొంటూ

2.తాళిబొట్టును మొక్కుకొంటూ
మొగుడినెత్తిన మొట్టుకుంటూ
పతియె పట్టని పతివ్రతలా నేతిబీరకు మారుగా
మనతోబాటు తమని తామే మభ్యపెట్టుకొంటూ

https://youtu.be/R0rwbDtEMuc?si=RBKXDlPM7WLDD2DG

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం :కానడ

కస్తూరి గంధాలు నీరాకలో
హరివిల్లు అందాలు నీకోకలో
కలహంస వయ్యారాలు నీ నడకలో
అమరసంగీతాలు నీ శ్రావ్యగీతికలో
చెలీ నీతో తీరని దప్పికో ఆరని ఆకలో
ప్రియా నీవే నీవే నమ్మలేని నిజమో కలో

1.పంటచేల మీది పైరగాలివో
నల్లమబ్బులోని మెరుపుతీగవో
కోవెలలో మ్రోగేటి జేగంటవో
కోనేటిలొ విరిసేటి కలువ బాలవో
చెలీ నీతో తీరని దప్పికో ఆరని ఆకలో
ప్రియా నీవే నీవే నమ్మలేని నిజమో కలో

2.ఛాతిపైన చెదిరిపోని పచ్చబొట్టువో
చేతిమీద చెరిగిపోని పుట్టుమచ్చవో
అనునిత్యం తట్టి లేపే సుప్రభాత గీతం నీవో
ఆదమరచి నిదురపుచ్చే అమ్మజోల పాటవో
చెలీ నీతో తీరని దప్పికో ఆరని ఆకలో
ప్రియా నీవే నీవే నమ్మలేని నిజమో కలో