Tuesday, August 9, 2022

 రచన,స్వరకల్పన&గానం:డా.రాఖీ


కొందరిని చూస్తే పెట్టబుద్ధి

కొందరిని చూస్తే మొట్టబుద్ది

కలిసిన వేళా విశేషమేమో

ఎదురైనప్పటి దుర్ముహూర్తమో

మూడునాళ్ళ ముచ్చటకెందుకు అకారణ ద్వేషాలు

నవ్వులు పంచుకుంటె చాలు ఏల వ్యర్థావేశాలు


1.కలుపుకొనగ సరిపోని సారూప్యతలు

వెతికి మరీ విభేదించు వ్యతిరేకతలు

తన బాటలొ సాగాలను నియంత పోకడలు

విభజించి వినోదించు వింతవింత ఎత్తుగడలు

మూడునాళ్ళ ముచ్చటకు అకారణ ద్వేషాలు

నవ్వులు పంచుకుంటె చాలు ఏల వ్యర్థావేశాలు


2.పారదర్శకత్వమే హృదయాన మృగ్యము

కప్పదాటు మాటలే అలవాటై నిత్యము

నిర్దుష్టతే కరువైన అస్పష్టపు వ్యక్తిత్వము

నొప్పించి మరీ ఆనందించే పైశాచికత్వము

మూడునాళ్ళ ముచ్చటకు అకారణ ద్వేషాలు

నవ్వులు పంచుకుంటె చాలు ఏల వ్యర్థావేశాలు