Sunday, October 9, 2022

 

https://youtu.be/4S6uXiJlT3g?si=g7yZRQgHern4c1e1

రచన,స్వరకల్పన&గానం:డా.రాఖీ


రాగం:దర్బార్ కానడ


అద్వైతమె సాంబశివా అర్ధనారీశ్వరము

వేదాంత దృష్టాంతరం నీ లింగాకారము

స్వస్వరూప స్వభావాల సారమే నీ అవతారము

భవతారకమై వరలును పంచాక్షరి జపసారము

నమఃశివాయ నమఃశివాయ నమఃశివాయ

నమఃశివాయ నమఃశివాయ నమఃశివాయ


1.బుసకొట్టే వాసనలే పన్నగ భూషణాలు

దహించే క్రోధానలమే ఫాలమందు నయనము

ఆత్మలింగార్పణమే లుబ్ధరాహిత్యము

పరిత్యాగివి పరమయోగివన్నదే సత్యము

భోలా శంకరా కనరాదు నీ కడ గర్వము

లీలా విలాసా చేరదు నిన్నెపుడూ మత్సరము


2.రంగు హంగు లేని హిమగిరి నీ గృహము

సుగంధాలు నోచని చితాభూమి నీవాసము

ప్రణవనాదమే వినోదించు బయకారము

గంగోదకమే నీ జిహ్వకు షడ్రసోపేతము

భస్మధారణే నీ దేహానికి చందనలేపము

పంచేంద్రియ జయ పంచభూతాత్మక వందనము

 రచన,స్వరకల్పన&గానం:డా.రాఖీ


తాకాలని ఎంతో తపన

తడమాలని ఎదలో తహతహ

నీ తనువు ఇంద్రచాపమే

నీ స్పర్శ చంద్రాతపమే

కొలవనీ చెలీ నిను ఆపాదమస్తకం

చదవనీ సఖీ నీవో అరుదైన పుస్తకం


1.రుచిచూడనీ నీమేను మిఠాయినీ

ఆఘ్రాణించనీ  అంగాంగ సారంగాన్నీ

అధిరోహించనీ కాయపు మాయా హయాన్నీ

చేరనీ ఏలగా మనదైన నిజమైన స్వర్గాన్నీ


అందించవే అందాల పసందైన విందునీ

నభూతోన భవిష్యతిగ పొందనీ పొందుని


2.పలికించనీ పెదవుల మోహన రాగాన్నీ

కలిగించనీ కౌగిట కదన కుతూహలాన్నీ

చిత్రించనీ నడుమున దంతక్షత వృత్తాన్నీ 

ఆరంభించనీ నాభిన ఆరభి ఆలాపాన్నీ


జుగల్ బందితో రక్తికట్టిద్దాం విభావరిని

పకడ్బందిగా తరిద్దాం రససిద్ధి జలధిని

 రచన,స్వరకల్పన&గానం:డా.రాఖీ


నా కన్నుల వెన్నెల నీవే

నా బ్రతుకున పున్నమి నీవే

నా ఎడారి దారిలోనా ఒయాసిస్సు నీవే

నా నిశీధి మనస్సుకు తొలి ఉషస్సు నీవే


1.విరహాగ్ని చల్లార్చే వలపుజల్లు నీవే

మది కాలిన గాయానికి నవనీతం నీవే

దుర్గమమౌ నా భవితకు స్వర్గసీమ నీవే

నా కలలను పండించే స్వప్నదేవి నీవే


2.నా నావను దరిజేర్చే సరిసరంగు నీవే

సరిగమలను పలికించే సారంగి నీవే

నన్నల్లుకోవే లతగ మారి ఈ వేళ

నా కలతను దూరంచేయవె నా జవరాల

 రచన,స్వరకల్పన&గానం:డా.రాఖీ


పాటనై ప్రతి పూట పల్లవించనీ

చరణాలనల్లుకొని కడతేరనీ 

నను పాడనీ వాణీ వేడనీ


1.ఎద భావనలే సుధలను చిలుకనీ

పదపదమున మధువుల నొలకనీ

పదికాలాలూ పెదవుల నది నలగనీ

మది తేలికయై మధురానుభూతి కలుగనీ


2.ఎంతగ కీర్తించినా సంతృప్తి లేదు

ఏకాగ్రతనే చూపినా నీ దయరాదు

గీతమే లేని బ్రతుకు ఊహకైన రాదు

కరుణించు మేలెంచు భరించలేనే నేనే చేదు