OK

మిత్రులందరికీ దసరా సరదాల అనందనందనాలు !! అభినందన చందనాలు !!!
పండగంటె ఏదో కాదు ఎంచి చూడగా
ఆనందం పొంగిపొరలి గుండె నాట్యమాడగా
అదే పండగా- బ్రతుకు పండగ
ప్రతి రోజూ పండగ- బ్రతుకంతా పండగ ||పండగంటె||

1. దశకఠులెంతో మంది దర్జాగా ఉండగా-దసరానా పండగా?
నరకులంత నడివీథుల్లోనడయాడుచుండగా దీపావళి పండగా!
నేతిబీరకాయ రీతి జరుపుకుంటె పండగ
పండగెందుకౌతుంది అది శుద్ధ దండగ ||పండగంటె||

2. రైతన్నకు కరువుదీరా పంట పండగ పండగ
నేతన్నకు కడుపారా తిండి ఉండగ పండగ
సగటు మనిషి ఆదమరచి పండగ పండగ
కన్నె పిల్ల కన్న కలలే పండగ పండగ ||పండగంటె||

3. పచ్చనైన ప్రకృతియే కనుల పండగ
కోయిలమ్మ పాట కచ్చేరి వీనుల పండగ
నెచ్చెలిచ్చు ఆనతియే ప్రియుని పండగ
జగతి మెచ్చు దేశప్రగతే జనుల పండగ ||పండగంటె||

4. పది మందితొ సంతోషాన్నీ పంచుకుంటె పండగ
నువు సాయం చేసిన నలుగురు బాగుపడితె పండగ
కలిసిమెలిసి ఉంటేనే కదా పండగ
మనసారా నవ్వితేనే సదా పండగ ||పండగంటె||