“జాతి నైజం”

“జాతి నైజం”
ప్రేమగా పెంచుకొన్న మల్లె తీగ
పక్కింటిలోకి పాకి పూలు పూసెగా
ముద్దుగా సాదుకున్న రామచిలుక
రెక్కలొచ్చాకచెప్పకుండ పారిపోయెగా

తిన్నింటి వాసాలే లెక్కించు నీ నైజం
కన్నీటి వరదలనే పారించు నా మోహం

1. ఆశించని నదిని సైతం చేస్తారా అపవిత్రం
ఫలమిచ్చే తరువును కూడ నరికేస్తే అదేమి చోద్యం
పంది మెచ్చు పంకాన్ని ఏల పన్నీటి జలకం
మార్చలేము వక్రమైతే శునకం వాలం వాలకం

అమ్మరొమ్ము గుద్దేటి విశ్వాస ఘాతుకం
వెకిలి నవ్వు నవ్వేటి వికృత పైశాచికం

2. ఇరువురికి మారుతుందా రెండిండ్ల మధ్యదూరం
తలోరీతి అనిపిస్తుందా స్నేహమనే పదానికర్థం
స్వీకారం మాత్రమే బంధాన్ని నిలుపుతుందా
పరస్పరం సూత్రమే పనికి రానిదవుతుందా

అందరినీ అన్నిసార్లు చేయలేముగా దగా
నిజాయితే లేనిచోట అనురాగం ఉండదుగా