OK

నిద్దురమ్మా రావమ్మా నీకు వందనం

సిద్ధపరచి ఉంచానమ్మా కలల అందలం

మత్తు మత్తుగ నన్నూ హత్తుకోవమ్మా

చిత్తమంతా ఆక్రమించి చుట్టుకోవమ్మా

1.మెత్తనైన పరుపును వేశా -నా గుండెసొంటి దిండునుంచా

హాయిగొలుపే జోలపాటలు-అల్లనల్లన ఆలపించా

నల్లనైన తెరలు దించా-కళ్ళఅలసట నంత తీర్చా

దోమలేవీ దూరకుండా గట్టి బందోబస్తే చేసా

నీఒడిలో చోటునివ్వు నిద్దురమ్మా

సేదదీరగ చేరదీయవె నిద్దురమ్మా

2.ఉక్కపోతను దూరం చేసా-అగరు బత్తుల ధూపం వేసా

ఎంతగానో బ్రతిమిలాడి రెప్పల్నీ వాలగజేసా

తీపి కబురుల ఊసులు తెలిపా-వింత వింత కథలే చెప్పా

తలను నిమిరి వెన్నుజో జోకొట్టి-వెచ్చగా నే అక్కున జేర్చా

 రాక తప్పదు నీవింక నిద్దురమ్మా

కరుణజూడవె నావంక నిద్దురమ్మా