మెడవొంపులోనా ఒక కుంపటి
కౌగిలింతలోను మండుతోంది కొలిమి
ఒళ్ళంతా వెచ్చదనం స్పర్శంతా కమ్మదనం
తపనలింక పెంచుతోంది వణుకుతున్న తమకం
తీయనైన బాధ ఏదో గొణుగుతోంది గమకం

1.చలి గాలి లోను సెగరేగుతోంది
వదులుతున్న ఊపిరి సైతం నెగడు కాగినట్టుంది
లతల్లాగ మారినాయి అల్లుకున్న దేహాలు
ఎవరుఎవరమో తెలియని వింతవింత వైనాలు
కుంచెగా మారుతు మోవి గీసెనెన్నొ చిత్రాలు
తడిమిన తనువణువణువు చేసెనెన్నొ చిత్రాలు

2.తుదిఏదొ మొదలేదో ఎరుగలేని మైకాలు
దారితప్పి చేరుకునే దివ్యమైన లోకాలు
అద్వైతమంటే సులువుగానె బోధపడింది
అర్ధనారీశ్వరతత్వం అనుభవైకవేద్యమైంది
మదనుడైన నేర్చుకొనే కొత్తకొత్త పాఠాలు
ఎంతసేపు రాసినా ఒడవని రసకావ్యాలు