https://youtu.be/KuOvm_zC-rE?si=8F7CqsxwmeCaz0mW

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం:భైరవి /దర్బార్ కానడ

కృతయుగమందున నీదరినున్నా
త్రేతాయుగమున నీ వశమైనా
ద్వాపరమందున నీ పరమైనా
కలిలో నీభక్తి పరవశనైనా
కృష్ణయ్యా నన్నూ మరిచావు ఇది భావ్యమా
కన్నయ్యా నాచెయ్యి విడిచావు ఇది న్యాయమా

1.నిరతము మదినెంచు ప్రహ్లాదుడనే
తపమాచరించిన ధృవుడను నేనే
నారాయణయనెడి నారదుడనే
నిను కీర్తించెడి తుంబురుడినే
నర్సయ్యా నన్నూ మరిచావు ఇది తత్వమా
రంగయ్యా చెయ్యి విడిచావు ఇదె ప్రాప్తమా

2.నది దాటించిన గుహుడను నేనే
ఎంగిలి ఫలమీయు శబరిని నేను
కబురందించిన జటాయు పక్షిని నేనే
ఎదలో నిను నిలిపిన హనుమను నేనే
రామయ్యా నన్నూ మరిచావు ఇది ధర్మమా
రాఘవయ్యా చెయ్యి విడిచావు ఇది నియమమా

3.అటుకులు పెట్టిన కుచేలుడనేనే
నీ జతకట్టిన గోపిక నేనే
పెదవులు తాకిన మురళిని నేనే
నీతో కూడిన రాధిక నేనే
శ్యామయ్యా నన్నూ మరిచావు ఇది వింతయే
గోపయ్యా చెయ్యి విడిచావు ఇక చింతయే

4.నీ కప్పిచ్చిన కుబేరుడ నేనే
నిను నుతియించిన అన్నమయ్య నేనే
నిను దర్శించిన తొండమాను నేనే
నిన్నే  నమ్మిన నీ రాఖీనే
శీనయ్యా నన్నూ మరిచావు ఇది దోషమే
తిరుపతయ్యా చెయ్యివిడిచావు ఇది ఘోరమే