రచన,స్వరకల్పన&గానం:రాఖీ

అందమె ఆనందమనీ అన్నారు ఆనాడు..
ఆనందమె అందమనరా నిను చూసిన ప్రతివారు
స్వచ్ఛమైన నీ నవ్వు మనసుకెంత ఉల్లాసం
హాయిగొలుపు నీ నవ్వు కనినంతనె ఆహ్లాదం
నిన్నుచూస్తు గడిపేస్తాను ఈ జీవితాంతం
రెప్పవాల్చలేకున్నాను లిప్తపాటుకాలం

1.కన్నులూ నవ్వుతాయని నీవుకదా తెలిపింది
వెన్నెల్లు రువ్వుతాయనీ ఇపుడె కదా ఎరుకైంది
హరివిల్లు విరిసిందీ నీ కనుబొమ్మల్లోనా
సింధూరం మెరిసింది నీ నుదుటి కనుమల్లోనా
నిన్నుచూస్తు గడిపేస్తాను ఈ జీవితాంతం
రెప్పవాల్చలేకున్నాను లిప్తపాటుకాలం

2.ముక్కుపుడక నవ్వుతుందా ఎక్కడైనా
సంపంగి నీముక్కున అది సాధ్యమేగా
పలువరుసలోనా ముత్యాల వానా
నీఅధర దరహాసం వర్ణించ నాతరమౌనా
నిన్నుచూస్తు గడిపేస్తాను ఈ జీవితాంతం
రెప్పవాల్చలేకున్నాను లిప్తపాటుకాలం