యవ్వనాన విరిసాయి సోయగాల విరులెన్నో
పరిమళాలు విరజిమ్మాయి పలువన్నెల కుసుమాలెన్నో
పయ్యెదనే పరిచాను పవళింపు సేవకొరకు
నా అంగరంగాన  క్రీడించు గెలిచే వరకు

1.కనుసైగలతోనే ఆహ్వానమందించేను
చిరునవ్వులు వెదజల్లి స్వాగతాలు పలికేను
కోటగోడలన్ని దాటుకరా బ్రద్దలుకొట్టి
అంతరంగ అంతఃపురమే ఉంచాను తెరిచిపెట్టి
నన్నేలుకోరా రారాజు నీవేరా
మురిపాలు గ్రోలరా మోజుతీరా

2.మూలబడి పోయింది వాత్సాయన కావ్యము
మామూలైపోయింది ఖజురహో శిల్పము
సింగారమంతా చిలుకరా నవ్యంగా
రసరమ్య గ్రంథమే రాయరా రమ్యంగా
మలుచుకో మోవినే లిఖించే కలంగా
నామేనే నీకికమీదట శ్వేతపుటల పుస్తకమవగా