రచన,స్వరకల్పన&గానం:రాఖీ

రాగం:కాంభోజి

ముక్కోటి దేవతల మురిపెమే నీ రూపు
పదునాల్గు భువనాల పరవశం నీ తలపు
శతకోటి భక్తుల కలా- వరం నీ చూపు
ఏడుకొండలస్వామి నీవెల్లరకు వేలుపు
నీ దృష్టి పడదేల గోవింద నా వైపు
నిను నమ్మి కొలిచేను ప్రతి పొద్దుమాపు

1.ఏ పుణ్యమో స్వామి ద్వారపాలకులది
ఎంత ధన్యమొ జన్మ నీ అర్చకులది
పావనమె ఆ బ్రతుకు పరిచారకులది
భాగ్యమే జీవితము గుడి సేవకులది
నా కీయవైతివే స్వామి నీ ప్రాపు
నిను నమ్మి కొలిచేను ప్రతి పొద్దుమాపు

2.నీ గర్భగుడిలోని దివ్వెదే సౌఖ్యము
నీ పాదపీఠిపై పువ్వుకూ మోక్షము
తరియించి పోతుంది అభిషేక సలిలము
ఆనందమొందేను నిను తాకి మారుతము
చెవిబడలేదా  ఆర్తియుత నా పిలుపు
నిను నమ్మి కొలిచేను ప్రతి పొద్దుమాపు