దాహం తీర్చినపుడె జీవనదికి సార్థకత
మనిషి త్రాగునీటిగా పంట సాగునీటిగా
క్షామం ఆర్చినపుడె మేఘమాల ఘనత
వర'దలై కురియగా వరదల ముంచెత్తకా
రంజింపచేస్తేనే  సాహిత్య సంగీత రమ్యత
శ్రవణపేయంగా సరస హృద్యంగా

1.అనునిత్యం పెను ఒత్తిడి యాంత్రిక జీవితాన
అనుభూతులె మృగ్యమాయె అలసిన హృదయాన
మొక్కుబడిగ గడపడమే రివాజాయె ఏ రోజున
సున్నతమౌ భావనలే కరువైపోయే తరుణాన
ఎదకు మేధకు ఆహ్లాకరమైన ఆటవిడుపు ప్రతిపూట
ఆలోచనామృతంగ ఆపాత మధురంగా పాటే ఊరట

2.దిక్కేతోచని వేళలోన నేస్తంగా మారుతుంది
ప్రేమరాహిత్యంలో అనురాగం పాడుతుంది
అపన్నుల గోడు తెలుప పొలికేక పెడుతుంది
నిస్తేజపు గుండెల్లో  దేశభక్తి దైవభక్తి ఔతుంది
ఎదకు మేధకు ఆహ్లాకరమైన ఆటవిడుపు ప్రతిపూట
ఆలోచనామృతంగ ఆపాత మధురంగా పాటే ఊరట