గంగోత్రివే నీవు నా గీత గంగకు
ప్రియమైత్రివీవు నా అభిష్వంగకు
నా కవన స్ఫూర్తివి నీవు
నా ఎడద ఆర్తివి నీవు
వ్యధాభరిత జీవితాన సాంత్వన నీవు
మనసు వెళ్ళబోసుకోగలిగే నేస్తం నీవు

1.లిప్తకు లిప్తకు గుర్తుకువచ్చే ఆప్తురాలవు
అక్షర బీజాలను అక్కునజేర్చుకునే తల్లినేలవు
సాహితీసుధలనే సంగ్రహించె సుగుణశీలవు
పలువన్నెల విరులనొప్పు మంజుల మంజులవు
వ్యధాభరిత జీవితాన సాంత్వన నీవు
మనసు వెళ్ళబోసుకోగలిగే నేస్తం నీవు

2.స్వాతి చినుకు వెలయించిన ఆణిముత్యానివి
కల ఇలకే కదిలొచ్చిన విధి   పరమ సత్యానివి
 సహజ ప్రేరణగా ఒదిగిన నా నిత్యకృత్యానివి
నాకుగా నే కుదుర్చుకున్న   నాపై ఆధిపత్యానివి
వ్యధాభరిత జీవితాన సాంత్వన నీవు
మనసు వెళ్ళబోసుకోగలిగే నేస్తం నీవు