రచన,స్వరకల్పన&గానం:డా.రాఖీ

నీవే మ్రింగావో నాకే పంచావో

గరళమే నిండింది నా గళములో

మాధురే కొఱవడింది గాత్రమ్ములో

నీలకంఠ కాలకూట విషతుల్యమాయే నా గానము

కపర్దీ  కఫమే ఊరుతు కర్ణకఠోరమాయె నా కంఠము

1.కమ్మగ పాడనాయే ఈ జన్మకు

శ్రోతల నలరించనాయె ఏ పాటకు

శ్రావ్యము మార్దవము శ్రవణపేయమే కాదాయే

భావ రాగ తాళ యుక్తమై ఏదీ ఒప్పారదాయే

2.గరగరలే గొంతులో లాలాజలం నోటిలో

పాటపాటకూ ఆగని ఊటలా ఆటంకమై

జన్మతః నోచుకోని గీతం జీవితపు లక్ష్యమై

అమృత సమగానమే బ్రతుకునకే మోక్షమై

3.పికమేమి పూజచేసి మెప్పించిందో

మైనా ఏమైనా మంత్రజపం చేసిందో

సెలయేరు వరమడిగి అభిషేకమొనరించిందో

పర్జన్యం మౌనంగా తపమెంత చేసిందో

4.సంగీత శాస్త్రరచన చేసిన వాడవే

నటరాజ లయాత్మకంగా తాండవమాడావే

నామీద నీకేల ఇసుమంతయు దయలేదా

కరుణా సముద్రా ఆర్ద్రతే కరువయ్యిందా