రచన.స్వరకల్పన&గానం:

ప్రణవానికి పూర్వం మౌనం

ప్రళయానంతరం మౌనం

జననానికి తొలుతగ మౌనం

మరణానికి అవతల మౌనం

మౌనమే గానానికి ముందుగా

మౌనమే సంతృప్తికి సాక్షిగా

ఆత్మను అల్లుకున్నది మౌనం

పరమాత్మను ఆవరించెనుమౌనం

1.మౌనమే మనిషికి పెట్టని అలంకారం

మౌనమే వ్యక్తిత్వాన్ని తూచే తులాభారం

నీలోకి నీవే తొంగిచూడు అంతా మౌనమే

కన్నులతో మాటాడగలిగే వింతా మౌనమే

2.కంచు మ్రోగేలాగ కనకం మ్రోగదు

మౌనం దాల్చావంటే కలహం ఉండదు

ఎల్లలు లేని విశ్వభాష ఏకైక మౌనమే

అక్షరమాల లేనిభాష లోకాన మౌనమే

3.మనసుకు మనసుకుమధ్యన వారధి మౌనమే

మనోరథాన్ని నడిపించే గీతాసారథి మౌనమే

ఎన్నో చిక్కు సమస్యలకు మౌనమే సమాధానం

ఆత్మజ్ఞానం పొందే క్రమాన మౌనం ధ్యాన సాధనం