రచన,స్వరకల్పన&గానం:డా.రాఖీ

పోరి నే తేలేనేమో పారిజాత వృక్షం  

కోరితే తేలేనేమో కోహినూరు వజ్రం 

దించగా లేనేమో చందమామ నీకోసం

ఛేదించగా లేనేమో ఏ మత్స్యయంత్రం

ప్రేమనందించగలను పరులెవరు మించనట్లుగా

ఆనందింప జేయగలను ఔరా అనిపించునట్లుగా

1.ఎపుడో చేరిపోయావు నాలో నీవే ఊపిరిగా

ఎపుడో మారిపోయావు నీవే నీవే ఎదలయగా

నీతలపులె నను జో కొడతాయి రోజూ

నీ ఊహలు ఉదయం లేపడమే రివాజు

ఆరాధించరరెవరు ఇలలో నేను మినహా

అనురాగం పంచరెవరు ఇలా నా తరహా

2.గుట్టంటూ ఏమీలేదు గుండెనే తెరిచేసా

నాదంటూ లేనేలేదు జీవితాన్నె పరిచేసా

నా మనసు నీకు తెలుసనీ నాకూ తెలుసు

నీ మనసు నేనెరిగిన సంగతి నీకూ తెలుసు

తెలిసినదైనా తెలియదనడమే నీ బిడియం

తెలిసినదైనా తెలియజెప్పడం నా నైజం