నీవు లేనిదెక్కడ నొడువుజవ్వని
కనరాని దెన్నడు పలుకుతొయ్యలి
కళలున్నచోట కలకలము నీవే
కవులు సంధించేటి కలము నీవే
అతురత మాకుంటే చేయూత నిస్తావు
మమ్మక్కున జేర్చుకొని ప్రేమగా లాలిస్తావు
1.అక్షరాలు అందెలుకాగా నీపదములు నర్తిస్తాయి
భావాలు పల్లవించగా కృతులెన్నొ ఉదయిస్తాయి
దృక్పథమే నీ పథమైతే పరమ పదము చేర్చేను
నిరంతరం నీ తపమందున పరమానంద మందేను
అతురత మాకుంటే చేయూత నిస్తావు
మమ్మక్కున జేర్చుకొని ప్రేమగా లాలిస్తావు
2.స్వర సప్తక వరమొసగి ధన్యులగావిస్తావు
సప్త చక్రాలయందున ఉద్దీపన ఒనరిస్తావు
గాత్రమనురక్తి సూత్రమై గీతార్చన కోరేవు
గాన రసాస్వాదనలో ఎదన హాయి కూరేవు
అతురత మాకుంటే చేయూత నిస్తావు
మమ్మక్కున జేర్చుకొని ప్రేమగా లాలిస్తావు
No comments:
Post a Comment