ఎఱవేయకో వెర్రి నేస్తమా- నే చేపను కాననీ గ్రహించుమా
కన్నెర సేయకో ప్రియ నేస్తమా-నే కొక్కెర కాననీ ఎరుగుమా

1. క్షణానికో రూపు దాల్చి-పలు వన్నెలు మార్చకు
అన్నిటిలో నేనేనని చిన్న తలను దూర్చకు
ఏడురంగులుంచు కొన్న ఇంద్రధనువునే నేను
మూడడుగుల విశ్వవ్యాప్త త్రివిక్రముణ్ణి నేను
అడ్డుపుల్ల లేయకుమా నేస్తమా-విఘ్నేశుడ నేననీ గ్రహించుమా

2. నవ్వించలని బోయి-నవ్వుల పాలుగాకు
నమ్మించి నన్నెపుడూ-వంచన చేయబోకు
నవరసాలు కురిపించే-ముఖ్యపాత్రధారి నేను
ఈ జగన్నాటకంలొ నటన సూత్రధారి నేను
కుప్పి గంతులేయకుమా నేస్తమా
హనుమంతుడనేనని గ్రహించుమా

3. అరచేతిలొ నాకెపుడూ –స్వర్గంచూపించబోకు
చిటికెవేసి నాకెపుడూ –తాళం నేర్పించ బోకు
చతుర్వేద సారమైన-సర్వాంతర్యామి నేను
ప్రణవ నాద రూపమైన-పరమ శివుడనే నేను
అహమింక మానుమో నేస్తమా-త్వమేవాహమనే నిజమెరుగుమా