ఓ అర్ధాంగీ

తిరిగే గానుగలో నలిగే చెరుకు గడవో
మరిగే పాలమీద కట్టిన మీగడవో
ఓ అర్ధాంగీ ..,నిన్నర్ధం చేసుకొనగ నా తరమా
ఓ సంపంగీ ..నినువీడి క్షణమైన మనగలనా

1. పనితో అలసినా-చెరగదు చిరునవ్వు
నలతగ నీకున్నా –నలగదు నీ మోముపువ్వు
శిరోవేదనే నరక యాతనౌతున్నా
మనోవేదనే గుండెను మెలిపెడుతున్నా
తబడదెప్పుడూ నీ అడుగు
కనబడ దెప్పుడునీ కన్నీటి మడుగు

ఓ అర్ధాంగీ ..,నిన్నర్ధం చేసుకొనగ నా తరమా
ఓ సంపంగీ ..నినువీడి క్షణమైన మనగలనా

2. ఆశలు ఆదిలోనె-అణగారిపోతున్నా
ఊహలు తృటిలోనె-చేజారిపోతున్నా
కాదెప్పుడు బ్రతుకు నీకు ప్రశ్నార్థకం
ఇల్లాలిగ నీపాత్ర అయ్యింది సార్థకం
బంధువర్గాన నీకు-అభినందన చందనాలు
మిత్రబృందాన నీకు-అభిమాన బంధనాలు

ఓ అర్ధాంగీ ..,నిన్నర్ధం చేసుకొనగ నా తరమా
ఓ సంపంగీ ..నినువీడి క్షణమైన మనగలనా