అనుదినమూ ఉగాది వేళనే
మదిమదిలో వసంత హేలనే
మావితోటల్లో కోయిలల పాటలే
మేను మరచి పాడే  కూని రాగాలే

1.తీపి చేదు ఏదోఒకటి
నిరీక్షణకు సార్థకంగా
గెలుపు ఓటమేదైనా
పరీక్షలకు ఫలితంగా
అనుభూతుల ఆస్వాదనలో
షడ్రసోపేతంగా
నవరసాల కలబోతే
రమ్యమైన జీవితంగా

2.ఉషోదయం ఆమనిగా
మధ్యాహ్నం వేసవిగా
సాయంత్రం చిరుజల్లుగా
రేయంతా శరత్తుమత్తుగా
చెలిసావాసమే చలికాలంగా
విరహాలు రేగా శిశిరంగా
ఆరుకారులే అరుదెంచంగా
రోజంతా బ్రతుకే మధురంగా