గులాబికెంతగానొ గుబులు
నీయంత సుకుమారి తాను కాననీ
కమలానికెంతగానొ కుళ్ళు
నీవదనమంత సుందరంగ తాను లేనని
ప్రకృతిలో ఏ పూవూ కాయలేదు
నీ అందంతో పందెం
చూస్తూండి పోతాను జీవితాంతం
రెప్పైనా వేయకుండ నీ సౌందర్యం

1.పోటీపడతాయి నీ పలువరుసతొ పోలిక కోసం
దానిమ్మ గింజలు ఆణి ముత్యాలు
ఆతృత పడతాయి నీ పెదాలతో సరితూగేందుకు
దొండపండ్లూ మందారపూలు
అమావాస్యనాడైనా వెన్నెల కురిపించేను
నీ చిరునవ్వులు
ఏ మోడునైనా చిగురులు వేయించేను
నీచూపులజల్లులు

2.నీలాల నీకురులకు సామ్యతకానేరవు
ఘన నీలి మేఘాలు తుమ్మెద వర్ణాలు
నీప్రశాంత తత్వానికి ఉపమానము కాబోవు
శ్వేతకపోతాలు హిమపర్వతాలు
పలుకుల ప్రవాహాల సుధపారును  నీ సన్నిధిలో
ఎడారులే వనాలై కడతేరును నీ సావాసములో