రచన,స్వరకల్పన&గానం:రాఖీ

మధువే ఎందుకు వెతలను మరిచేటందుకు
మత్తే ఎందుకు గాలిలోన తేలేటందుకు
విధిశాపగ్రస్తుల్లారా దైవోపహతులైనారా
భగ్నప్రేమికుల్లారా దగాపడి బ్రతికేస్తున్నారా
నా పాటవింటే కలుగునెంతొ ఊరట
నా గాధ నెరిగారంటే మీకంట ఇంకదు ఊట

1.అందరూ ఉన్నాగాని అనాధనే నేను
ఏలోటు లేకున్నా వింతబాధనే నేను
ముప్పొద్దుల తిన్నాగాని తీరిపోదు ఆకలి
బస్తాలా ఉన్నాగాని నీరసంతొ నే బలి
యోగా చేయమనసున్నా ఆ యోగమే శూన్యం
ఉదయాన నడకైనా నడవలేని దైన్యం

2.అంతుబట్టలేని మనోవ్యాధి నాది
వైద్యమన్నదే లేని విచిత్రమైనదే అది
గుండె ఎప్పుడో చెలితో ఛిద్రమైనది
బండబారిపోయింది హృదయమన్నది
ఆత్మతృప్తి నోచనిదే ఎన్నున్నా వ్యర్థమే
మనశ్శాంతి పొందితే మనిషి జన్మ సార్థకమే