రచన,స్వరకల్పన&గానం:రాఖీ
రాగం: యమన్ కళ్యాణి

భావాలు పావురాలై ఎగిరేను స్వేఛ్ఛగా
అనుభవాలు పంజరాలై బంధీలు చేయునుగా
కలమెంత సహకరించినా
కాగితమే కదలనీదుగా
గొంతుతో చెలిమి కలుపుతూ
పాటగా పరిణమించుగా

1.కోయిలకు కూయాలని ఉన్నా
మావి చివురు కరువైతేనో
వెన్నెలకు కాయాలని ఉన్నా
రాహువే కమ్మేస్తేనో
ఎంతటి చైతన్యమైనా
ప్రకృతికి లోబడి ఉంటుంది
చాతుర్యమెంతటిదైనా
కాలానికి  కట్టుబడుతుంది

2.ఎన్నిముళ్ళు వేస్తే ఏమి
మనసులే ముడివడకుంటే
ఏడడుగులు వేస్తేఏమి
అడుగేసినా అడుగుతు ఉంటే
నమ్మకమే ఆయువుపట్టు
బ్రతుకునావ సాగడానికి
సర్దుబాటు బాటపట్టు
సుఖకరమౌ కాపురానికి