అనివార్యం మరణం-అనిశ్చితం జీవితం
ఎందుకు ఆరాటం-ముగియించగ అర్ధాంతర పయనం
భరించు ఏమీ ఆశించక-ఎదిరించు నీదైనతీరుగ
ఆత్మహత్య అర్థరహితము
మనుగడ సాగించడమే హితము మహితము

1.పరికించిచూడు ప్రకృతిని-పరిసరాలలోని జీవరాశిని
పిపీలికాది పర్యంతం-సలిపేను జీవన పోరాటం
ప్రమాదాల్లో చిక్కుబడినా-బ్రతుక ప్రయత్నిస్తాయి
చావు తావచ్చే వరకు-చచ్చుకుంటు బ్రతికేస్తాయి
బుద్దితెచ్చుకోవాలి అల్పమైన ప్రాణుల చూసి
సర్దుకోలేనపుడు సాగు తెగతెంపులు చేసి

2.కష్టాలు లేనివారు-ఇలలోన లేనెలేరు
పీతకష్టం పీతది-సీతకష్టం సీతది
చూసావా ఎప్పుడైనా-జలధి జల రుచిని
కన్నీటి వల్లనే-మారిందది లవణ స్థితిని
అవకరాలనధిగమించే ధీరులే ఆదర్శం
విధివంచితులైనాసరే వీడబోరు ఆత్మస్థైర్యం