రచన,స్వరకల్పన&గానం:రాఖీ
రాగం:నళినకాంతి

నళిన కాంతి నయన నగుమోము శ్రీపతి
ననుగొనిపోవా నీ తిరుమల తిరుపతి
పరమపదమె కాదా నీ పద సన్నిధి
పదిలముగా చేకొనరా ఓ పరమదయానిధి

1.తహతహలాడెడి చకోరి కోరు రీతిగా
తపనలనొందెడి చాతకమ్ము తీరుగా
ఆకలిగొనియున్న అన్నార్తి మాదిరిగా
నీకడ నిలవాలనీ నే కడతేరాలనీ
నిను నెర నమ్మితిరా రమాధవా మాధవా

2.తొక్కుడు బండలాగ ఓపిక నాకు లేదు
ప్రతీక్షణం ప్రతీక్షలో బ్రతుకగ నేనోపలేను
కఠోరమౌ నియమాల పాటించగా లేను
బలీయమౌ సంకల్పమె నా ఏకైక సాధన
నా ప్రార్థన మన్నించర కనికరముతొ కరివరద