రచన,స్వరకల్పన&గానం:రాఖీ

మూసిఉంచితేనే గుప్పిటిగుట్టు
విప్పిచూపించితే ఎంతటి ఎబ్బెట్టు
అందీఅందనపుడె గుండెలకారాటము
నేలరాలు పళ్ళపట్ల ఉండదు ఉబలాటము
సౌందర్యము సాంప్రదాయము పరస్పరం శ్రేయోదాయకం
పరికిణి వోణీల తెలుగుదనం నయనానందకారకం

1.పాశ్చాత్య పోకడలు దేశీయత ముందు వెగటు
అనాఛ్ఛాద సోయగం మగటిమికే చేటు
ఉప్పువంటిదే వంటలో ఉత్సుకతను రేపడం
తగ్గినా పెరిగినా తప్పదు అబాసుపాలవడం
సౌందర్యము సాంప్రదాయము పరస్పరం శ్రేయోదాయకం
కట్టూబొట్టులతో  తెలుగుదనం నయనానందకారకం

2.జడ మెడ నడుము నడక అందాలకు నెలవులే
ఎదపై పయ్యెద మువ్వల పాదాలు సొగసుకు కొలతలే
దోబూచులాడే నాభీ ప్రకటన మగదృష్టికి సుడిగుండమేలే
క్రీగంటిచూపులు మునిపంటినవ్వులూ మంత్రదండాలే
సౌందర్యము సాంప్రదాయము పరస్పరం శ్రేయోదాయకం
చిరుబిడియపు తెలుగుదనం నయనానందకారకం