రచన,స్వరకల్పన&గానం:రాఖీ

రాగం:రేవతి

“ మాంగల్యం తంతునానేనా
మమజీవన హేతునా!
కంఠే భద్నామి సుభగే
త్వం జీవ శరదాం శతం!! ”

ఎలా కలుపుతాడో భగవంతుడు
భిన్నమైన ధృవాలను
ఎందుకు ముడిపెడతాడో పరమేశ్వరుడు
విభిన్నమైన మనస్తత్వాలను
ఎంతటి బలమైనతాడో చెరోవైపు లాగినా తెగనే తెగదు
ఎందుకీ మాయలో పడతాడో తెలిసీ వగచుట తగదు

1.దాంపత్య మంటేనే ఆధిపత్య రాహిత్యం
నవరసాలు నిండిఉన్న అద్భుత సాహిత్యం
అభిప్రాయభేదాలకు తగ్గదు సాన్నిధ్యం
నిత్యం వాదనల నడుమ చెదరదు బాంధవ్యం
ఎంతటి బలమైనతాడో చెరోవైపు లాగినా తెగనే తెగదు
ఎందుకీ మాయలో పడతాడో తెలిసీ వగచుట తగదు

2.భారతీయ వైవాహిక వ్యవస్థ ఘనతనో ఇది
వేదమంత్రాలలోని మహిమాన్విత ఫలితమో ఇది
ఒకరిపట్ల ఒకరికున్న విశ్వసనీయతనో ఈ గుఱి
కాపురాల కాలాంతర అనురాగ మర్మమో మరి
ఎంతటి బలమైనతాడో చెరోవైపు లాగినా తెగనే తెగదు
ఎందుకీ మాయలో పడతాడో తెలిసీ వగచుట తగదు