మరలిరాని గతమేదో బావురుమంది
మనసైన నెచ్చెలి చేరువయింది
అలనాటి అనుభూతుల్లో అలరించింది
నన్ను నేను మరిచేలాగా మదినాక్రమింది

1.పెచ్చులూడిన నా భవంతికి వెల్లెవేసింది
దుమ్ముబట్టిన నాముంగిలిలో రంగవల్లి తానయ్యింది
మసకబారిన ఆశాదీపపు మలినాలు కడిగింది
కొడిగట్టి ఆరే వత్తిని వెలిగేలా చేసింది

2.ఎడారైనా దారిలో వసంతమై ఎదురయ్యింది
ఏకాకి నా బ్రతుకులో కోయిలగా కూసింది
తడారే నా గొంతులో అమృతవర్షిణయ్యింది
తనువు మనసు అంకితమిచ్చి తానె నేనుగ మారింది