రచన,స్వరకల్పన&గానం:డా.రాఖీ

నారు పోసిన నీవు-నీరు పోయగ లేవా
ఈత నెరుగని మమ్ము-ఏరు కడపగ లేవా
ఏడు కొండల సామి-బదులు పలుకవేమి
మము గన్న మాతండ్రి-దారి చూపవదేమి

1.ఎలుగెత్తి అరిచింది ఏనుగు ఆనాడు
ఆదర బాదరగా - ఆదుకొంటివిగాదా
దీనంగా వేడింది ద్రౌపది శరణంటూ
చీరలనందించి మానము కావగలేదా

2.నీకున్న పని ఏమి లోకాలేలే సామీ
మంచిని పెంచడము -చెడ్డను తుంచడమే
పడక వేసినావొ పడగ నీడలోన
కునుకే తీసినావో లిప్తపాటులోన